VOV4.Jarai - Hrơi Jar kmar pioh kơ mơnuih mă bruă lơ 1/5 pơphun mơng plơi prong pơkra gơnam hăng măi mok prong Chicago, dêh čar Mi. anun lĕ thun 1886, ƀơi plơi prong hơmâo sang măi prong Chigago, Jơnum Khul pơlir hơbit mơnuih mă bruă dêh čar Mi kiăo tui tơlơi pơtrun lăi rơđah “Mơng lơ 1/5/1886, hrơi mă bruă mơng abih bang ƀing kông ñơn lĕ 8 mông”. Arăng ruah lơ 1/5 anai ngă hrơi pioh kơ mơnuih mă bruă lĕ, yua hră pơkôl ngă bruă phrâo kơplah wah ƀing ngă bruă hăng pô apah hơmâo kĭ. Ƀing tư bản dưi thâo hlâo tơlơi pơsit mơng ƀing kông ñơn mơ̆ huăi ĕp jơlan pơgal glăi ôh. Khă hnun, lơ 1/5/1886, yua tơlơi rơkâo mơng ƀing kông ñơn ƀuh dưi ngă tui djŏp ôh, ƀing kông ñơn ƀơi dêh čar Mi gum tơgŭ ngă lơgreo pơdơi bruă kiăng pô apah ngă tui tơlơi gơñu kiăng. Blung a tơlơi ngă lơgreo pơdơi bruă ƀơi plơi prong Chicago. Năng ai 40 rơbâo čô mơnuih ƀu nao mă bruă pơ sang măi. Gơñu jơnum, ngă lơgreo ƀơi plơi prong hăng tơlơi pơhiăp “Mơng hrơi anai ƀu hơmâo pô hlơi ngă bruă rơgao 8 mông amăng ha hrơi! Khŏm ngă bruă 8 mông đôč, 8 mông pơdơi pơdă, 8 mông ngui ngor!”. Tơlơi tơgŭ hơkrŭ anai ngă pơhưč lu mơnuih gum ngă.

Lơ 1/5, dưi lăng kah hăng boh tŭ yua prong hơmâo mă, pơdah thâo tơlơi gir run khut khăt ngă giong bruă jao phrâo hăng pơdah rai tơlơi khăp gum pơgôp amăng mơnuih mă bruă apah hăng djop dêh čar. Lơ 1/5 ăt jing hrơi pơpŭ kơ ling tơhan mơnuih mă bruă, tơgŭ hơktŭ kơ tơlơi rơnuk rơnua mơak, ngă khua pô, tơlơi hiam mơak kơ mơnuih mơnam. Ră anai, Hrơi jar kmar pơdơi mă bruă jing hrơi mơak mơ̆ng ƀing mơnuih ngă kông ñơn hăng mơnuih ƀôn sang mă bruă amăng dêh čar ta, hrơi gum pơgôp amăng ƀing ngă kông ñơn hăng djop djuai ania arăng kơtư̆ juă amăng rŏng lŏn tơnah lơ̆m tơgŭ hơkrŭ yua kiăng rơnua rơnua, mơak, rơngai djuai ania, ngă khua pô hăng mơnuih mơnam mơak klă.

Siu H’Mai - Nay Jek: Pơblang