Rơnuč thun, anom pơkra gơnam Sang bruă bơwih ƀong sĭ mơdrô bôh ñông Hải Bình Gia Lai, plơi prong Plei Ku, tơring čar Gia Lai dik dak hna asar bôh ñông kơ arăng rơkâo blơi kơ Tết tui phiăn juăt. Ơi Hoàng Văn Quang, Khua pơ ala kơ Sang bruă brơi thâo, ăt bôh ñông mơn, mơ̆ng hơdôm kual pla ƀơi tơring čar samơ̆ bôh ñông mơ̆ng sang bruă hmâo mă gơnam OCOP 4 asar bôh pơtŭ, glăk anăp nao tơhnal pơkă 5 asar bôh pơtŭ, jing kơnang kơ hơdră ngă phara ha jăn: asar bôh ñông hna hăng apui djuh. Gơnam juăt laih mơ̆ ăt phara mơn, hmâo djru laih sang bruă pok prong anih anom sĭ mơdrô, wot amăng lŏn ia hăng ba sĭ kơ dêh čar tač rơngiao:

“Anom bơwih ƀong ăt hmâo mơn lu kơmlai. Anun lĕ tơlơi sĭ gơnam kơ dêh čar tač rơngiao hmâo tơlơi pơplih rơđah rơđông bơhmu hăng hơdôm thun hlâo adih. Hơdôm bơnah blơi ƀơi hơdôm bôh dêh čar kual Mi Kô̆ hăng hơdôm bôh dêh čar kual Đông Nam Á pơkon hmâo gơgrong hlâo nao hơduah ĕp pioh pok prong anih anom pioh ba nao sĭ. Kiăng djơ̆ tui tơhnal pơkă sĭ kơ dêh čar tač rơngiao, anom bruă ăt glăk gir run djơ̆ tui hơdôm tơhnal pơkă pơsit gưl dlông hloh, pơplih phrâo hloh”.

Truh abih thun 2024, kual Dap Kơdư hmâo laih rơbêh kơ 1.300 mơta gơnam OCOP dưi tŭ yap mơ̆ng 3 truh kơ 5 asar bôh pơtŭ. Gơnam OCOP Dap Kơdư ƀu kơnong kơ ruah mă mơ̆ng pran jua mă bruă hăng pơčeh phrâo ôh mơ̆, dô̆ jing tơlơi bă kơ ư-ang kơ kual hmâo gru grua, kah hăng “Trà hoa vàng”, OCOP 3 asar bôh pơtŭ mơ̆ng tơring glông Krông Pač, tơring čar Dak Lak. Ơi Nguyễn Ngọc Quỳnh, pô pơjing rai gơnam anai brơi thâo, mơ̆ng sui, ñu hmâo hmư̆ lăi nao kơ tơlơi yôm phăn mơ̆ng djuai bơnga anai, anun lơm thâo amăng glai Dap Kơdư ăt hmâo mơn djuai bơnga anai, ñu hmâo đing nao pơlar trà bơnga kơñĭ. Tơdơi giăm hmâo 10 thun pla, ñu hmâo laih 3.000 ƀĕ phun bơnga pla ƀơi 2 ektar lŏn, kiăng yak mut rơwang pơkra trà. Ơi Quỳnh lăi pơthâo:

“Kâo lăng ƀuh lĕ, Việt Nam ƀing ta hmâo lu gơnam yôm hmâo nua, biă ñu lĕ hơdôm djuai phun jrao. Hăng tơlơi kiăng khăp kơ plơi pla lŏn ia, kâo čang rơmang djă pioh hăng pơlar hyu dong, hrŏm hăng anun lar hyu pơ̆ neh wa ƀơi plơi pla, iâo pơthưr djop mơnuih pơgang phun pla, pơjing sa kual pla hăng pơgang anih anom hmâo phun jrao mơ̆ng drơi pô hăng hơdôm mơnuih jum dar”.

Kiăng khăp, ư-ang hăng thâo mă yua kual lŏn hmâo lu gru grua, lu mơta kông ngăn glai klô, yă Lê Thùy Kim Loan, Khua Sang bruă Pyloherb ƀơi tơring čar Kon Tum hmâo pơhrua glăi laih hăng 15 mơta hmâo tŭ yap gơnam OCOP. Tui hăng yă Lê Thùy Kim Loan, abih bang hơdôm mơta gơnam mơ̆ng sang bruă leng kơ dưi pơkra mơ̆ng phun jrao glai klô. Neh wa ƀơi hơdôm bôh plơi kual čư̆ siăng gah tơring glông Kon Plông hăng Đăk Glei, tơring čar Kon Tum lĕ hơdôm mơnuih sĭ djuai jrao klă hiam kơ bruă pla pơkra. Yua anun yơh, rim gơnam OCOP leng kơ hmâo gum hơgôp mơ̆ng abih bang plơi pla:

“Tŭ yap OCOP lĕ pơdah kơ gơnam djă jă gru grua kual. Lơm dưi tŭ yap OCOP, ƀing gơmơi lăng ƀuh gơnam mơ̆ng pô hmâo hơdôm anô̆ phara ha jăn, mơ̆ng phun jrao klă, gơnam truh kơ mơnuih mă bruă leng kơ rai mơ̆ng kual lŏn anai. Tem OCOP pơsit ƀơi tơring čar Kon Tum hmâo pơsit gơnam phun jrao phara ha jăn mơ̆ng kual”.

Mơ̆ng phun jrao lĕ hơdôm gơnam lăng juăt biă samơ̆ hăng tơlơi kiăng khăp, ư-ang kơ gơnam plơi pla, rim mơnuih ƀôn sang Dap Kơdư hmâo pơčeh rai hơdôm gơnam OCOP phara ha jăn djă ba tôm mơngưi ñu, gru rup mơ̆ng kual lŏn. Hơdôm bôh than mơ̆ng jơlan hơdră rim să sa gơnam ƀơi anai brơi ƀuh tơhnal gal prong mơ̆ng bruă pơkĕ hrŏm gru grua plơi pla hăng tơlơi pơmin pơplih phrâo. Tơlơi anun ƀu kơnong kơ djru pơđĭ dlông tơlơi hơdip mơda mơ̆ng mơnuih ƀôn sang ôh mơ̆, ñu dô̆ lar hyu tơlơi ư-ang kơ Dap Kơdư lu mơta./.