Sang anŏ amai Ma Sỹ dŏ amăng plơi Ka Rái 1, să Ka Đơn, tơring glông Đơn Dương, tơring čar Lâm Đồng, lĕ sa amăng hơdôm boh sang anŏ tŭ mă tơlơi đing nao yôm phăn amăng bơyan čơkă thun phrâo anai. Anai lĕ sang pơdong prong rơhaih. Ñu ol kơdol brơi thâo:

“Tơdah ƀu hơmâo tơlơi gum djru mơng gong gai, kâo ăt ƀu thâo truh hơbin sang anŏ kah mơng hơmâo sang dŏ sir kjăp. Bơni kơ Ping gah, Kơnuk kơna, bơni kơ neh met wa amăng plơi pla, yua hơmâo abih bang mơ̆ ƀing gơmơi hơmâo sang phrâo, huăi bơngŏt nao kơ sang dŏ dong tah. Ƀing gơmơi amra gir run hrưn đĭ amăng tơlơi hơdip mơda, kiăng kơ ană bă hơmâo tơlơi hơdip jơnap ƀiă dong”.

Tŭ mă gơnam djru prong hlâo kơ čơkă thun phrâo, amai H’Juet Niê dŏ ƀơi să Čư̆ Pui, tơring glông Krông Bông, tơring čar Dak Lak, ăt hok mơ-ak biă mă. Amai H’Juet brơi thâo, ană ñu ruă kă sui thun laih, sang anŏ 4 čô dŏ hơdip amăng sang tơ̆i rơ̆i, ră anai hơmâo sang phrâo ăt pơtrut pran jua kiăng kơ ñu găn rơgao tơnap tap:

“Bơyan bơyan anai, sang anŏ hơmâo sang phrâo, ƀing gơmơi hok mơ-ak biă mă. Anai lĕ tơlơi pơtrut pơsur kiăng dua rơkơi bơnai hrưn đĭ amăng tơlơi hơdip mơda, găn rơgao tơnap tap, pơklaih mơng ƀun rin hăng hơđong tơlơi hơdip mơda kơñ pơgi”.

Tết tui phiăn juăt jê̆ giăm laih, hrŏm hăng bruă ječ ameč man pơdong sang phrâo jao brơi hơdôm boh sang anŏ tơnap tap, hơdôm boh tơring čar kual Dap kơdư, hơmâo pơphun hơdôm bruă bơwih brơi tết. Hơdôm rơbăn anung gơnam Tết hơmâo jao tơl tơngan kơ neh met wa amăng djop plơi pla ala ƀon. Mah nua ƀu lu đơi ôh samơ̆ hơdôm anung gơnam anai kiăng pơdah pran khăp pap, tơlơi đing nao, pơtrut pơsur. Amai H’Loen Kbuôr, dŏ amăng ƀuôn Ea Nao B, să Ea Tu, plơi prong Buôn Ma Thuột ăt pơdah tơlơi hok mơ-ak mơng ñu lơm tŭ mă anung gơnam Tết yôm phăn:

“Thun anai, sang anŏ gơmơi hơmâo Tết, bơni kơ djop khul grup, bơni kơ Ping gah hăng Kơnuk kơna hơmâo đing nao gum djru ƀing gơmơi. Ƀing gơmơi pơpŭ bơni biă mă hăng hok mơ-ak lơm tŭ mă tơlơi gum djru anai”.

Kual Dap kơdư amăng hơdôm hrơi anai glăk pơphun dik dak hơdôm jơlan hơdră “Tết tum jơngum”. Hơdôm khul grup anun lĕ khul ia jrao kyâo bơrơkal mriah, Jơnum min djop djuai ania mơnuih mơnam, Khul pơlir mơnuih mă bruă, hrŏm hăng ƀing mơnuih, anom bơwih ƀong sĭ mơdrô lêng kơ gum tơngan hrŏm kiăng abih bang mơnuih, mah mơnuih djuai ania ƀiă, mơnuih ƀun rin ƀudah sang anŏ tơnap tap, lêng kơ dưi čơkă thun phrâo mơ-ak mơ-ai. Ơi Trương Công Thái, kơ-iăng khua Jơnum min mơnuih ƀôn sang tơring čar Dak Lak brơi thâo:

“Lơm truh bơyan čơkă thun phrâo Ping gah tơring čar, Jơnum min pơ ala mơnuih ƀôn sang, Jơnum min mơnuih ƀôn sang tơring čar, Jơnum min djop djuai ania mơnuih mơnam Việt Nam tơring čar hơmâo git gai hơdôm khul grup Ping gah kah hăng djop gưl gong gai ƀon lan hrŏm hăng ƀing čơmah, anom bơwih ƀong sĭ mơdrô amăng tơring čar ngă tui jơlan hơdră pơtrut pơsur kiăng ngă tui jơlan hơdră Tết tum jơngum, djru brơi neh met wa čơkă thun phrâo pơđao pran jua. Hrŏm hăng jơlan hơdră ruh hĭ sang tơ̆i rơ̆i, sang dŏ jang jai, bruă ƀơk gơnam brơi neh met wa sang anŏ tơnap tap lĕ bruă yôm phăn biă mă”.

Amăng hơdôm hrơi rơnuč thun, lơm Tết jê̆ giăm laih, tơlơi bơră ruai lăi nao hơdôm boh sang anŏ hơmâo sang phrâo, hơdôm gơnam Tết ƀu djơ̆ kơnong ba glăi tơlơi hok mơ-ak brơi ƀing gơñu đôč ôh mơ̆ ăt ba glăi tơlơi đăo gơnang nao pran khăp pap, tơlơi gum pơgôp thâo djru tơdruă. Anai lĕ gơnam djru yôm phăn, kiăng bơyan bơnga anai jing bơnga khăp pap, djru tơdruă hăng čang rơmang nao kơñ pơgi hiam klă./.