VOV4.Jarai - Khua anih jưh pơ ala kơ Việt Nam ƀơi dêh čar Lao phrâo lăi pơthâo kơ bruă pơdơi jăng jai brơi mơnuih Việt Nam glăi mơng dêh čar Lao, truh abih lơ 30/5/2021. Ƀơi anăp tơlơi pơhing hơdôm hrơi rơgao, sa dua čô mơnuih dêh čar ta rơkâo glăi mơng dêh čar Lao hmâo hơdôm anom wai lăng ƀơi bah amăng jang Việt Nam ƀu brơi, Khua anih jưh pơ ala kơ Việt Nam ƀơi dêh čar Lao brơi thâo: Bruă anai lĕ ngă tui hră pơ-ar mơng Anom bruă Kơnuk kơna dêh čar Việt Nam kơ bruă “Rơkâo pơdơi jăng jai bruă mut tơbiă hăng abih bang hơdôm mơnuih rơkâo mut tơbiă amăng lŏn ia biă ñu mơng hơdôm bôh dêh čar India, Thái Lan, Kur, Lao truh abih lơ 30/5/2021. Hơdôm mơnuih hmâo rơkâo hlâo kơ 28/4/2021 ăt dưi mut rai tui tơlơi pơkă mơn. Hăng hơdôm mơnuih pha ra rơkâo mut rai ƀơi Việt Nam, khom hmâo tơlơi tŭ ư mơng Ding jum pơtom hiăp dêh čar Việt Nam hăng ngă tui djop tơlơi pơtô ba mơng Ding jum ia jrao”. Khua anih jưh pơ ala rơkâo mơnuih dêh čar Việt Nam glăk dô̆ hơdip mơda, mă bruă hăng hrăm bruă ƀơi dêh čar Lao ngă tui tơpă tơlơi pơkă mơng dêh čar Lao hăng mơng Việt Nam kơ pơgang pơgăn klin Covid-19; ƀu tơbiă đuăi mơng anih dô̆, tơdah hmâo bruă kiăng ječ đô̆č dưi rô hyu; ƀu dưi rŏng nao mă pơ̆ bah amăng jang ôh lom akă dưi tŭ ư glăi pơ̆ lŏn ia, ngă tơnap kơ bruă khul mơnuih glăk dô̆ mă bruă./.

Siu H’ Prăk: Pô pơblang