VOV4.Jarai - Tlam lơ 8/4, Khua pơ ala mơnuih ƀon sang dêh čar tal XIV pơđut mông jơnum lok 11. Đĭ pơhiăp pơđut mông jơnum, Khua pơ ala mơnuih ƀon sang dêh čar ơi Vương Đình Huệ lăi rơđah: tơdơi kơ 12 hrơi mă bruă ječ ameč, gơgrong, tơpă sit, Jơnum lok 11, Khua pơ ala mơnuih ƀon sang dêh čar tal XIV hơmâo pơčrông sai giong hơdôm boh tơhnal hơmâo ba tơbiă hăng jơnum pơphun hiam klă. Khua pơ ala mơnuih ƀon sang dêh čar hơmâo lăng glăi tơpă, abih bang bruă mă amăng rơwang thun 2016-2021 mơng hơdôm anom bruă Kơnuk kơna, sem lăng, pơsit bruă ruah khua mua hăng hơdôm boh tơhnal pơkŏn. Khua pơ ala mơnuih ƀon sang dêh čar pioh lu hrơi mông kiăng pơčrông sai, lăng glăi tơlơi lăi pơthâo bruă mă mơng Khua pơ ala mơnuih ƀon sang dêh čar, khua mir sir, Kơnuk kơna, hơdôm anom bruă amăng Ƀirô Khua pơ ala mơnuih ƀon sang dêh čar, Sang phat kơđi, Anom bruă pơsir kơđi tơlơi, Anom bruă jŭ yap ngăn drăp Kơnuk kơna.

Mông kơkuh hla kơ pơđut jơnum lok 11, Khua pơ ala mơnuih ƀon sang dêh čar tal XIV

Ăt amăng čơtlăm lơ 8/4 mơn, Khua pơ ala mơnuih ƀôn sang dêh čar ta pơsit tơlơi rơkâo mơng Khua mir sir dêh čar kơ hră čih anăn Kơ-iăng Khua mir sir dêh čar hăng sa dua Ding kơna Khul pơgang lŏn iă hăng rơnuk rơnua plơi pla tui hơdră plĕ hră hơgom, amăng anun, Khua dêh čar ơi Phạm Minh Chính ngă K-iăng Khua Khul pơgang lŏn ia hăng rơnuk rơnua plơi pla. Khua git gai wai lăng pơ ala mơnuih ƀôn sang dêh čar ta ơi Vương Đình Huệ, Khua Ding jum khul ling tơhan dêh čar ta ơi Phan Văn Giang, Khua Ding jum pơtom hiăp ơi Bùi Thanh Sơn ngă Ding kơna Khul pơgang lŏn ia hăng rơnuk rơnua plơi pla. Khua pơ ala mơnuih ƀôn sang dêh čar ăt pơsit mơn hăng hơdră pơlĕ hră hơgom hră čih anăn ruah ơi Đỗ Văn Chiến (Khua git gai Ping gah, Khua git gai Ping gah Khul Jơnum min djop djuai ania mơnuih mơnam dêh čar Việt Nam) hăng yă Võ Thị Ánh Xuân (Ding kơna Ping gah dêh čar, Kơ-iăng Khua mir sir dêh čar) pioh kơ bruă Kơ-iăng Khua Khul ruah khua lŏn ia, hrom hăng lu bruă apăn Ding kơna Khul ruah khua lŏn ia. Tơdơi kơ anun, Khua pơ ala mơnuih ƀôn sang pel ĕp Tơlơi pơtrrun pơsit kơ bruă pơsit hră ruah mơnuih mă bruă phrâo kơ sa dua Kơ-iăng Khua mir sir hăng sa dua Ding kơna Khul ruah khua lŏn ia./

Siu Đoan - Siu H' Prăk: Pơblang