VOV4.Jarai-Lơ 27/4, Khua ding jum pơtom hiăp ơi Bùi Thanh Sơn hơmâo pơhiăp telephôn bơkơtuai hăng Khua ding jum pơtom hiăp dêh čar Nga, ơi Sergei Lavrov. Amăng mông bơkơtuai nao rai, Khua ding jum pơtom hiăp dêh čar Nga, ơi Sergei Lavrov bơni hơơč kơ boh tơhnal pơtom hiăp mơ̆ng Việt Nam phrâo anai, amăng anun, ngă khua ASEAN 2020 tŭ yua hăng ding kơna ƀu sit nik Khul pơgang tơlơi rơnuk rơnua Sang gum hơbit djop dêh čar 2020-2021, lăng yom tơlơi gơgrong jai hrơi ƀuh rơđah mơ̆ng Việt Nam amăng jar kmar hăng amăng kual.

Dua čô khua ding jum ăt pơčrông sai mơ̆n kơ tơlơi pơhing ngă hrom kơplah wah Nga hăng Việt Nam, biă mă ñu bruă pơhlôm, pơgang klin Covid 19 ăt kah hăng bruă ngă hrom dua bơnah ding jum pơtom hiăp, bruă ngă hrom dua bơnah amăng mông jơnum prong lu dêh čar, amăng anun hơmâo Khul pơgang tơlơi rơnuk rơnua sang gum hơbit djop dêh čar laih anun ƀơi ASEAN.

 Dua čô khua ding jum pơdah pran jua čang rơmang pơtrut ngă tui klă hơdôm bruă mă amăng thun bơblih nao rai ngă bruă Việt –Nga amăng thun 2021.

Nay Jek: Pơblang