VOV4.Jarai - Čơtlăm lơ 27/4, amăng rơwang Khul wai lăng bruă sĭ mơdrô rŏng lŏn tơnah (WTO), mông pel ĕp Hơdră bruă sĭ mơdrô tal 2 mơng Việt Nam dưi hmâo Ding jum sĭ mơdrô pơphun tui hơdră lăng nao rai amăng tivi. Pơ ala kơ Grŭp dêh čar Việt Nam, ơi Trần Quốc Khánh – Kơ-iăng Khua Ding jum sĭ mơdrô hmâo lăi đĭ laih bôh tơhnal klă biă hăng ƀuh rơđah mơng Việt Nam yap mơng mông pel ĕp hơdră bruă sĭ mơdrô tal blung a amăng thun 2013, hrom hăng anun lăi rơđah pran pơsit mut hrom abih bang, dơlăm, pơplih bruă bơwih ƀong sĭ mơdrô ăt kah hăng tơpă ngă tui hơdôm tơlơi pơkôl jar kơmar. Amăng mông jơnum, ƀing khua pơ ala mơng Ding kơna WTO ăt hmâo čih pioh mơn tơlơi pơđĭ kyar mơng bruă bơwih ƀong Việt Nam, hrom hăng anun ba tơbiă hơdôm tơlơi tơña kiăng mơnuih pơ ala bơnah Việt Nam lăi glăi, kah hăng: anih anom tuh pơplai bơwih ƀong sĭ mơdrô Việt Nam, hơdră pơkă sĭ mơdrô hăng tuh pơplai, hơdôm hơdră bruă sĭ mơdrô kơ pơkă gah bruă rô nao rai hăng dêh čar tač rơngiao, mă jia blơi sĭ gơnam hăng dêh čar tač rơngiao, pơgang hlôm hlâo sĭ mơdrô, tơlơi dưi bôh thâo ia rơgơi, blơi prăp kơnuk kơna, hơdră bruă pơđĭ kyar sa dua gơnong bruă phun kah hăng bruă đang hmua, akan hơdang, apui yua, măi mok, jơlan nao rai dŭ pơgiăng, bruă dăng kông....

Siu H’ Prăk: Pô pơblang