VOV4.Jarai - Mơguah lơ 16/4, ƀơi Anom bruă Ping gah tơring čar Gialai, Khul apăn bruă Ping gah tơring čar tal XVI hơmâo pơphun Jơnum lok 3 (pok prong) kiăng kơ lăng bruă ngă bruă amăng 3 blan akŏ thun, pok pơhai bruă mă, bruă jao amăng 3 blan tŏ tui thun 2021. Jơnum tal anai ăt đing nao pơgôp hiăp hăng črăn hră pơsit mơng Ping gah tơring čar kơ bruă “Pơjing, hơmâo lu dong ƀing apăn bruă amăng tơring čar Gialai hơdip hiam, mă bruă rơgơi, arăng đăo gơnang, pơhlôm djơ̆ bruă jao”. Anai lĕ jơlan hơdră bruă yôm phun amăng tơlơi pơsit mơng Jơnum ruah khua Ping gah tơring čar tal XVI (rơwang thun 2020-2025). Đĭ pơhiăp amăng mông jơnum, Khua git gai Ping gah tơring čar ơi Hồ Văn Niên lăng yôm hơdôm boh than dưi hăng lăi nao tơpă hơdôm bruă aka ƀu klă; rơkâo ƀing khua nao jơnum kiăng đing nao lăng glăi, ngă rơđah hơdôm bruă aka ƀu klă; laih dong mơng tơlơi găn rơgao anun kiăng hơmâo hơdră pơsir kiăng kơ ngă klă bruă jao amăng 3 blan tŏ tui, pơhlôm ngă pơgiong bruă jao amăng pơđĭ kyar bơwih ƀong huă-mơnuih mơnam thun 2021.

Siu Đoan: Pơblang