VOV4.Jarai - Ƀrô hrơi ngă lơphet hơdor 46 thun Hrơi pơklaih rơngai Việt Nam, pơlir hơbit lŏn ia, Khul hlăk ai tơring čar Gia Lai pơphun jơlan hơdră glăi čuă anih gru đưm hăng pơphun mă yua Pơtâo čih pioh gru đưm Hlăk ai hơkrŭ tơring čar Gia Lai rơwang thun 1962-1975 ƀơi plơi Tăng Lăng (să Krong, tơring glông Kbang). Tơdơi hrơi truh kih mơng bruă hơkrŭ Đồng Khởi thun 1960, tơring čar Gia Lai jing kual rơngai, ngă gal brơi kơ ƀing hlăk ai dưi ngă bruă.

Pơphun yua Pơtâo čih pioh gru đưm Hlăk ai hơkrŭ tơring čar Gia Lai

Akŏ thun 1962, anom bruă Khul hlăk ai hơmâo akŏ pơdong, pơƀut, pơtô ba ƀing hlăk ai gum pơgôp nao rai tơgŭ blah ayăt roh. Hơmâo lu rơnuk khua mua, ƀing hlăk ai, tơdăm dra djai drơi pô, gum hrŏm hăng ling tơhan, tơhan blah ngă pơklaih rơngai tơring čar. Kiăng hơmâo dong sa “Anih mriah” pơtô ba gru grua, Hlăk ai tơring čar hơmâo jak iâu arăng gum pơkra Pơtâo čih pioh gru đưm anom bruă Hlăk ai hơkrŭ tơring čar Gia Lai ƀơi să Krong. Ring bruă anai hơmâo man pơdong ƀơi 2.000 met karê lŏn, prăk tuh pơ alin rơbêh 600 klăk prăk.

Siu H’ Mai: Pô pơblang