VOV4.Jarai - Ding jum pơtô hrăm bơi thâo, truh 11 mông lơ 5/5, hơmâo laih rơbêh 631 rơbâo čô cơđai čih anăn nao pơplông abih anih 12, amăng anun hơmâo lu hloh lĕ ƀing čơđai čih anăn pơplông gah tơlơi hrăm Khoa học xã hội, hăng rơbêh 53% mrô čơđai nao pơplông. Tui hăng jŭ yap mơng anom bruă wai lăng bruă pơplông, Ding jum pơtô hrăm, amăng mrô rơbêh 631 rơbâo ƀing čơđai čih anăn nao pơplông hơmâo rơbêh 21 rơbâo čô čơđai rơkâo mă. Bruă ruah tơlơi pơplông hơmâo anŏ phara biă mă, amăng anun rơbêh 244 rơbâo čơđai čih anăn pơplông gah Khoa học tự nhiên, rơbêh 38%, rơbêh 336 rơbâo čơđai čih anăn pơplông gah Khoa học xã hội, rơbêh 53%. Hơmâo laih rơbêh 504 rơbâo čô čơđai čih anăn rơkâo kiăo tui puang hrăm anih 12, rơbêh 79% čô čơđai. Tui hăng tơlơi pơkă tal pơplông abih anih 12 hăng pơmut hrăm gưl prong pơphun pơplông lăng nao rai mơng ataih. Kơnong kơ bruă čih anăn pơplông lăng nao rai mơng ataih amra sui truh 5 mông tlam lơ 16/5. Tal pơplông abih anih 12 thun 2021 him lăng amra pơphun mơng lơ 6 truh lơ 9/7.

Siu Đoan: Pơblang