VOV4.Jarai - Ƀrô hrơi ngă lơphet 45 thun hrơi akŏ pơdong tơlơi rô nao rai Việt Nam - Ethiopia (1976-2021), Khua ding jum pơtom hiăp dêh čar ơi Bùi Thanh Sơn hơmâo pơhiăp telephôn hăng Kơ-iăng khua dêh čar, Khua ding jum pơtom hiăp dêh čar Ethiopia Demeke Mekonnen bơkơtuai kơ tơlơi ngă hrŏm dua bơnah hăng ngă hrŏm ƀơi hơdôm mông jơnum lu bơnah. Ƀơi mông pơhiăp tom, dua bơnah hơmâo lăi nao hơdră pơtrut đĭ hloh dong tơlơi ngă hrŏm kơplah wah dua bơnah amăng hrơi blan pơ anăp, amăng anun bruă bơkơtuai pơtom hiăp nao rai hăng grup  khua mua amăng bruă pơgang klin Covid-19 khŏm ngă hlâo, gơñăm nao pok prong bơwih ƀong huă, kơsem min hơdră ngă hrŏm ăt kah hăng čih pơkra giong tơlơi phiăn đah mơng ngă amuñ brơi bruă ngă hrŏm dua bơnah. Dua bơnah ăt bơkơtuai nao sa, dua tơlơi hơmâo amăng kual hăng ƀơi rŏng lŏn tơnah mơ̆ dua bơnah lêng lăp đing nao, Khua ding jum pơtom hiăp ơi Bùi Thanh Sơn pơsit, Việt Nam dong yua pơsir djŏp tơlơi rung răng ƀu mơ-ak hăng hơdră bơkơtuai rơngai, kiăo tui tơlơi phiăn jar kmar, lăp djơ̆ hăng Phiah phiăn Sang gum hơbit djŏp dêh čar.

Siu H’Mai: Pơblang