VOV4.Jarai - Ngă tui tơlơi git gai mơng Kơnuk kơna hăng Ding jum ling tơhan, bruă pơgang klin Covid-19 kơtuai guai lŏn ia ƀơi tơring čar Kontum glăk hơmâo ling tơhan wai pơgang guai lŏn ia tŏ tui pơphun kjăp hăng lu hơdră bruă kiăng pơgang, pơgăn klin lar hyu amăng tơring čar.

Ƀơi kual amăng jang jar kmar Bờ Y, gah să Pờ Y, tơring glông Ngọc Hồi, tơring čar Kontum hơmâo rơbêh 20 km glông ha guai hăng dêh čar Lao hăng Kur anai lĕ anih juăt ƀuh mơnuih mut rai dêh čar ta čar čot. Ƀơi anăp kơ tơlơi anai, Puih tơhan wai pơgang guai lŏn ia ƀơi amăng jang Bờ Y hơmâo akŏ pơjing 6 grup, anih wai pơgang klin Covid-19 anun lĕ tơhan wai lăng ha anih hăng ƀing hyu tir ƀơi guai lŏn ia. Ƀơi hơdôm anih wai lăng anai hrŏm hăng 45 čô tơhan, ƀing apăn bruă ăt hơmâo wŏt tơhan wai lăng amăng să pơphun hyu tir kơtuai jơlan guai lŏn ia tơhrơi kah hăng mlăm. Thiêú tá Đoàn Xuân Trường, Kơ-iăng khua grup hyu pơtô pơblang, Puih tơhan wai lăng ƀơi amăng jang jar kmar Bờ Y brơi thâo, rĭm čô tơhan, mơnuih apăn bruă mut hrŏm hơdôm grup, anih wai lăng gir run găn rơgao tơnap tap kiăng pơgiong bruă jao.

Ling tơhan ƀơi Puih tơhan wai lăng amăng jang jar kmar Bờ Y hyu tir kiăng kiăng pơgang klin Covid-19 ƀơi guai lŏn ia

Ƀing gơmơi tơhrơi kah hăng mlăm wai lăng hăng hyu tir ƀu brơi hlơi ôh găn nao rai ča čot hăng dŏ gak kjăp ƀu brơi klin lar hyu. Mah adơi ayong wai lăng ƀơi anai bưp lu tơnap tap, kơƀah djop mơta. Jơlan nao rai ăt tơnap tap samơ̆ hlơi hlơi lêng kơ gir run găn rơgao tơnap tap kiăng pơgiong bruă jao.

Hrŏm hăng brua kơtưn wai lăng ƀu brơi mơnuih ƀon sang găn nao rai găn lŏn ia ča čot, Puih tơhan wai lăng ƀơi amăng jang Bờ Y ăt pơtrut kơtang pơtô pơblang bruă pơgang klin Covid-19 brơi kơ tuai čuă ngui hăng mơnuih ƀon sang hơmâo đang hmua giăm guai lŏn ia. Ƀing tơhan mơng puih tơhan nao tơl rĭm boh sang anŏ kiăng kơ mơnuih ƀon sang truă akhăn gôm ƀô̆ lơ̆ nao pơ hmua kah hăng ngă tui hơdră pơgang klin; lơ̆m nao ngă hmua ƀu brơi găn nao rai ča čot … Tơlơi anai brơi ƀuh hrŏm hăng pran kơđiăng amăng pơgang klin Covid-19, rĭm čô mơnuih ƀơi guai lŏn ia ăt lĕ ƀing mơnuih djru brơi ling tơhan amăng bruă pơgang klin hăng wai lăng kjăp guai lŏn ia ta. Yă Nang Cứu, dŏ ƀơi plơi Iệc, să Pờ Y hơmâo hmua giăm guai hăng dêh čar Lao brơi thâo:

Lơ̆m nao ngă hmua ană plơi pla ăt hơmâo tơhan pơtô pơblang. Neh met wa kah hăng kâo pô tơdah ƀuh blơi thâo ƀu thâo krăn khŏm lăi pơthâo brơi ling tơhan.

Bruă pơtô pơblang bruă pơgang klin Covid-19 brơi mơnuih ƀon sang giăm guai lŏn ia mơng Puih tơhan wai lăng amăng jang jar kmar Bờ Y

Trung tá Đặng Nguyên Hương, Khua apăn bruă Ping gah, mơnuih apăn bruă ƀơi puih tơhan wai lăng amăng jang jar kmar Bờ Y brơi thâo, ƀing apăn bruă, ling tơhan lêng kơ gir run kơđiăng ƀơi anăp kơ tơlơi tơnap tap mơng klin Covid-19.

Ƀơi anăp kơ tơlơi tơnap tap mơng klin Covid-19 ƀơi dêh čar Kur hăng Lao, ƀing gơmơi hơmâo pok pơhai hơdră wau lăng kơ thâo rơđah klin Covid-19 ƀơi dua boh dêh čar ha guai kiăng pơtô pơblang brơi mơnuih ƀon sang hăng ling tơhan thâo kiăng kơ prap lui hơdră pơgang klin Covid-19. Gir run ƀu brơi klin lar kơtuai tui guai mut rai tơring čar hăng anom bruă.

Ƀơi anăp kơ tơlơi tơnap tap mơng klin Covid-19, hơmâo jơlan guai glông rơbêh 292 km ha guai hăng dêh čar Lao hăng Kur, tơhan wai pơgang guai lŏn ia tơring čar Kontum ră anai glăk dŏ wai na nao ƀơi 66 anih, hăng rơbêh 400 čô mơnuih apăn bruă, ling tơhan kơtuai tui guai lŏn ia kiăng kơ pơphun bruă ha amăng plĕ pơgang klin ruah hăng wai lăng guai lŏn ia kjăp rah.

Siu Đoan: Pơblang