VOV4.Jarai-Tlam mơmŏt lơ 12/4, rơbêh 500 čô čơđai sang hră gưl prong Lao, Kur hlăk hrăm pơ ƀôn prong Hồ Chí Minh nao mơak hrom gru grua ngă yang thun phrâo Bunpimay dêh čar Lao ƀudah Chol Chnam Thmay dêh čar Kur. Hơdră anai, yua kơ anom bruă khua hlăk ai tơdăm dra mut phung ƀôn prong Hồ Chí Minh ngă hrom sang bruă khua anih jưh pơ ala dêh čar Kur hăng Lao ƀơi ƀôn prong Hồ Chí Minh pơphun.

Anai lĕ bruă mă kiăng pơdah tơlơi pơđing nao, pơtrut pran jua čơđai sang hră gưl prong dêh čar Lao hăng Kur hlăk dŏ hrăm pơ hơdôm sang hră gưl prong ƀôn prong Hồ Chí Minh ƀrô djơ̆ bơyan ngă yang thun phrâo Bunpimay dêh čar Lao hăng Chol Chnam Thmay dêh čar Kur juăt pơphun amăng plah wah blan 4 rĭm thun.

Bruă ngă anai, djru brơi hlăk ai tơdăm dra čơđai sang hră gưl prong ƀơi ƀôn prong Hồ Chí Minh, tơdăm dra čơđai sang hră gưl prong Lao hăng Kur bưp nao rai, tơña bla kiăng thâo hluh tơlơi phiăn, gru grua mơ̆ng đưm djuai ania Việt Nam-Lao-Kur, djru ngă mơak tui tơlơi khăp gum pơgôp gru grua, tơlơi ngă pŭ ƀăn giăng mah mơak klă mơ̆ng 3 boh dêh čar.

Nay Jek: Pơblang