VOV4.Jarai - Thun 2021, sang hră Đaị Học Tây Nguyên him lăng amra ruah 3.340 čô čơđai sang hră hrăm đại học sit nik, hăng 35 tơlơi hrăm bruă gah 8 anih pơtô hrăm, jing sang hră hơmâo pơtô lu čơđai sang hră gưl prong hloh amăng kual. Amăng anun hơmâo hơdôm anih hrăm kiăng ruah lu čơđai kah hăng:  Hrăm ia jrao, Hrăm tơlơi Anglê, Pơjrao hlô mơnong, Bơwih ƀong huă, Wai lăng tơlơi bơwih ƀong, Kế toán, Pơkơjăp drơi jăn. Hơdră ruah čơđai thun 2021 hơmâo kiăo tui 4 mơta: Ruah kiăo tui mrô puang pơplông abih anih 12 thun 2021; ruah kiăo tui mrô puang pơtŏng lăng tơlơi rơgơi thun 2021 mơng Sang hră Đại học Quốc gia ƀon prong Hồ Chí Minh; ruah kiăo tui hră học bạ; ruah dưi hrăm hlao tui Tơlơi pơtrun ruah čơđai hrăm hră thun 2021. Kơ-iăng nai tha prin, nai prin tha Võ Phương Đại Nguyên, Khua wai lăng anih pơtô pơjuăt gưl prong, Sang hră Đại học Tây Nguyên brơi thâo: hơdră pơtô hrăm thun 2021 mơng sang hră amra pơhlôm brơi ƀing čơđai dưi hrăm tơlơi phrâo, djơ̆ hăng tơlơi kiăng mơng anom bruă hơduah ĕp mơnuih mă bruă tơdơi kơ hrăm giong.

Siu H’Mai: Pơblang