VOV4.Jarai - Lơ 11/5, Grup mă bruă mơng Anom bruă git gai tơhan Quân khu 5 yua Trung tướng Thái Đại Ngọc, Ding kơna apăn bruă Ping gah, Tư lệnh Quân khu 5 ba jơlan ngă bruă hăng tơring čar Dăk Nông kơ bruă tơhan - pơgang lŏn ia thun 2021.

Tui hăng tơlơi lăi pơthâo, ngă tui tơlơi git gai, črâo bruă mơng Ping gah tơring čar, Jơnum min mơnuih ƀon sang Dăk Nông, thun blan rơgao, tơhan blah ngă tơring Dăk Nông lêng kiăo tui tơlơi hmư̆ hing, bruă mă hăng tơlơi hơmâo sit ƀơi tơring čar, kơjăp bruă ngă hrŏm hăng djŏp gưl, anom bruă tañ hmư̆ tơhnai, pơphô bruă kơ ping gah, gong gai ngă klă bruă ling tơhan - pơgang lŏn ia ƀơi tơring čar. Hơdôm anom bruă ngă klă bruă prăp lui hăng pơphun ngă lơphet jao, čơkă tơhan thun 2021 kơjăp phik, pơhlôm rơnuk rơnua, dưi hơmâo 100% mrô pơkă. Giăm 1000 čô tơdăm dra mơng tơring čar nao ngă tơhan. Hrơi jao, čơkă tơhan ƀơi hơdôm boh tơring glông, plơi prong hơmâo pơphun kơdrưh kơ-ang, hơdeč hmar, pơhlôm rơnuk rơnua amăng hrơi mông hơmâo klin Covid-19. Ƀing hlăk ai tơdăm dra nao ngă tơhan amăng tal anai hơmâo nao ngă bruă tơhan ƀơi Ding jum kông ang; Anom bruă Kĭ thuâ̆t (Ding jum ling tơhan); Lữ đoàn phòng không 234 (khul tơhan pơgang adai rơngit), Quân đoàn 3 (Ding jum ling tơhan); Lữ đoàn 573 (Quân khu 5); Anom bruă git gai tơhan tơring čar; Ling tơhan pơgang guai tơring čar hăng Kông ang tơring čar.

Mông ngă bruă

Amăng bruă dŏ gak, kơjăp pran blah ngă ƀơi hơdôm anom bruă hơmâo ngă klă. Ling tơhan ƀơi tơring čar Dak Nông lêng ngă hrŏm dŏ gak wai lăng kơjăp ƀơi jơlan amur, jơlan nao rai gah guai, gum pơgang klin Covid-19 tŭ yua hloh. Tơhan blah ngă ngă hrŏm hăng kông ang, tơhan pơgang guai kơjăp bruă wai pơgang mông ruah khua pơ ala mơnuih ƀon sang dêh čar tal 15 hăng khua pơ ala mơnuih ƀon sang djŏp gưl rơwang thun 2021-2026, gum djă bong hơđong bruă čar, hơđong kơjăp mơnuih mơnam ƀơi tơring čar.

Pơhiăp ƀơi mông ngă bruă, Kơ-iăng khua Jơnum min mơnuih ƀon sang tơring čar Dak Nông ơi Lê Trọng Yên pơsit, ping gah, gong gai tơring čar lêng lăng ba pơjing tơhan blah ngă kơjăp phik, dưi ngă djŏp bruă hơmâo jao. Bruă tañ thâo, pơblang rơđah, pơsir bruă aka ƀu dưi ngă, ƀu brơi hơmâo anih rung răng, gum pơđĭ kyar bơwih ƀong huă, pơhlôm brơi tơlơi hơdip kơ mơnuih ƀon sang. Biă ñu, tơring čar lăng ba, juh alum pran jua hăng djru prăk kăk hăng ling tơhan dŏ gak hrơi mlăm pơgang klin Covid-19 ƀơi guai lŏn ia.

Kiăng khua Jơnum min mơnuih ƀon sang tơring čar Dak Nông ăt rơkâo kơ Anom git gai tơhan Quân khu 5 lăng ba, git gai djru kơ tơring čar pơđĭ kyar bơwih ƀong huă hrŏm hăng pơhlôm pơgang rơnuk rơnua, biă ñu lĕ hrŏm hăng tơring čar pơsir hĭ hơdôm tơlơi aka ƀu rơđah bơdjơ̆ nao lŏn pioh pơdong puih kơđông tơhan pơgang lŏn ia.

Pơhiăp ƀơi mông ngă bruă, hrŏm hăng tơlơi bơni kơ hơdôm tơlơi dưi ngă, Trung tướng Thái Đại Ngọc - Ding kơna Ping gah, Git gai Quân khu 5 kiăng, tơhan blah ngă tơring čar Dak Nông pơtrut đĭ pơphô bruă kơ gong gai djŏp gưl, ngă klă bruă tơhan - pơgang lŏn ia thun 2021 hăng kơjăp pran prăp lui bruă blah ngă, čih pơkra hơdră pơgang ba hơdôm anom bruă kơnuk kơna...

Tơhan blah ngă tơring čar Dak Nông kiăng ngă hrŏm hloh dong hăng djŏp gưl, anom bruă, thâo djŏp tơlơi pơmin, pơsir klă tơlơi rơnuk rơnua hơđong kơjăp ƀơi tơring čar, ƀơi anăo hrŏm hăng ping gah, gong gai pơhlôm, pơgang klin Covid-19, pơgang ba mông plĕ ruah khua pơ ala mơnuih ƀon sang dêh čar tal 15 hăng khua pơ ala mơnuih ƀon sang djŏp gưl rơwang thun 2021-2026 rơnuk rơnua.

Siu H’Mai: Pơblang