VOV4.Jarai - Ƀơi anăp tơlơi hŭi rơhyưt mơng klin Covid-19, tơhan pơgang guai tơring čar Kon Tum phrâo hơmâo pơđĭ tui mrô tơhan, đah mơng pơgăn hĭ ƀing mut nao rai ča čot ƀơi jơlan guai giăm dêh čar Lao hăng Kur. Tui anun, hơmâo 8 puih kơđông tơhan pơgang guai tơring čar Kon Tum hơmâo pơhrua tui 100 čô tơhan si kuan, tơhan apăn bruă mơng Anom git gai tơhan tơring čar. Tơdơi kơ čơkă mă tơhan, Anom bruă git gai tơhan pơgang guai tơring Kon Tum hơmâo pơtŏp brơi tơlơi pơhing gah guai lŏn ia, klin Covid-19 ƀơi dêh čar Lao hăng Kur, laih dong lăi pơthâo rơđah tơlơi gơgrong bruă, bruă kiăng ngă mơng ƀing khua, ling tơhan mơng Anom bruă git gai tơhan tơring čar amăng hrơi mông mă bruă djru 8 puih kơđông tơhan. Ling tơhan pơgang guai tơring čar Kon Tum brơi thâo, khua mua, ling tơhan dŏ gak ƀơi jơlan guai glong rơbêh 292km giăm hăng dêh čar Lao, Kur lêng hơmâo tơlơi djru ba, juh alum mơng ƀing khua soh amăng bruă wai lăng pơgang guai hăng pơgang klin Covid-19.

Tơhan pơgang guai pôr pơthâo bruă pơgang klin Covid-19 kơ ƀing tuai hyu ngui pơ anih pơdong gŏng guai Việt Nam - Lao - Kur.

Siu H’Mai: Pơblang