Yap truh plah wah blan 2/2025, hơmâo 15 čô khua mua apăn bruă ping gah yua khul apăn bruă phun ping gah tơring čar Kon Tum wai lăng ngă hră rơkâo pơdơi hlâo abih thun bruă. Amăng anun hơmâo ơi Nguyễn Trung Hải, ding kơna apăn bruă phun anom bruă ping gah tơring čar, Khua anom pơtô bruă Ping gah tơring čar Kon Tum, 14 čô khua apăn bruă dŏ glăi rơkâo pơdơi hlâo truh thun lĕ ƀing apăn bruă ping gah tơring čar, khua hăng kơ-iăng khua gơnong bruă hơdôm sang bruă gưl tơring čar.

Yă Ngô Thị Hoàng Anh, Kơ-iăng khua anom pơphun bruă ping gah tơring čar Kon Tum brơi thâo, ƀing khua apăn bruă ngă hră rơkâo pơdơi, hơmâo ngă tui djơ̆ Hră pơtrun mrô 18 mơ̆ng Khua mua apăn bruă ping gah dêh čar, kiăng ngă gêh găl brơi bruă ngă tui djơ̆ jơlan hơdră mơ̆ng gơnong dlông pơtrun, pơblih phrâo, dăp glăi sang bruă kơnuk kơna amăng abih glông bruă kơđi čar, laih dơ̆ng ngă gêh găl brơi kơ ƀing apăn bruă thun hlăk ai hlăk mơdrah pơyơr pran jua kơ bruă čar.