Yă Võ Thị Bạch Nga, pô sang sĭ gơnam ƀơi phường Tân Lập, tơring čar Dak Lak brơi thâo, truh bơyan ngui ƀong tết tui phiăn juăt rĭm thun, hơdôm boh sang sĭ gơnam lêng kơ prap lui djop mơta gơnam sĭ amăng bơyan ƀong tết hơmâo ƀañ kĕo, tơpai ƀiêr, ia mơmih, braih, ia mơmuă, ia mơsin, ngok hra…Kiăng kơ hơmâo prăk blơi mut gơnam, ñu čan prăk mơng jơlan hơdră hơđong nua gơnam yua Kơnuk kơna pok pơhai, hăng mrô prăk čan giăm 2 klai prăk.

“Kâo pơmĭn mrô prăk čan giăm 2 klai prăk, ƀing gơmơi kiăng blơi pơmut hlâo kơ tết kiăng hơmâo gơnam sĭ hơđong. Kâo čang rơmang kmlai amra tŏ tui giăm rơbêh 6.0 kar hăng rĭm thun, hăng hơmâo djru hơđong, amra ngă gêh gal brơi sang sĭ mơdrô hăng wŏt mơnuih blơi yua. Lơm hơmâo prăk čan hơđong nua sĭ lơm kmlai aset, him lăng sang sĭ mơdrô ăt huăi đĭ nua lu đơi ôh, hăng tui anun mơnuih blơi yua ăt hơmâo tơlơi dưi mơn”.

Ơi Bùi Quang Hòa, khua sang sĭ mơdrô prong Co.opmart Buôn Ma Thuột brơi thâo, bơyan ƀong tết Bính Ngọ thun anai, mơnuih blơi yua gơnam lu hloh anun lĕ añăm tam, boh troh, mơnong ƀong huă, braih, sik hăng hra, arăng him lăng đĭ giăm 6% ƀơi sang sĭ mơdrô. Kiăng pơhlôm brơi gơnam sĭ, anom bruă hơmâo nao mă bruă hăng hơdôm anih sĭ gơnam, rơkâo prap lui djop gơnam, pơhlôm gơnam hơdjă, thun blan yua tong ten, laih dong anăm đĭ nua blơi mut soh tơlơi pơkă.

“Mă bruă hăng gơnong bruă tuh tia pơkra ming hăng sĭ mơdrô tơring čar Dak Lak, ƀing gơmơi ƀuăn pơhlôm nua sĭ hơđong hăng lăi pơthâo tong ten ƀơi sang sĭ mơdrô, amăng 3 blan dong mơng lơ 15/12/2025-15/3/2026. Kiăng ngă tui tơlơi ƀuăn anai, ƀing gơmơi mă bruă hăng hơdôm anih sĭ gơnam hăng ƀing gơñu ăt bơtŭ ư hăng kĭ hră pơkôl, amăng hơdôm hrơi hlâo, amăng hăng tơdơi Tết amra sĭ gơnam mơ̆ huăi đĭ nua”.

Pok pơhai jơlan hơdră hơđong nua sĭ hlâo, amăng hăng tơdơi tết Bính Ngọ 2026 tui tơlơi git gai mơng Kơnuk kơna, amăng tơring čar Dak Lak hơmâo 16 khul čan prăk mut hrŏm. Ơi Trần Minh Hòang, kơ-iăng Khua sang bruă prăk sĭ mơdrô pơčruih ngă Tuh pơ alin hăng pơđĭ kyar tơring čar Dak Lak (BIDV) brơi thâo, mut hrŏm jơlan hơdră, sang bruă prăk hơmâo hăng glăk pok pơhai lu anung prăk čan mă kmlai ƀiă kiăng djru brơi hơdôm anih anom, ƀing mơnuih sĭ mơdrô hơdôm gơnam yua bơyan ƀong tết. Hơdră brơi čan hơmâo ngă tui hơdeč hmar tui tơlơi rơkâo, brơi rơnoh čan mă yua lăp djơ̆, ngă hră pơ-ar tañ, kmlai ƀiă hăng hơđong, mơng anun ngă gêh gal kiăng hơdôm anom sĭ mơdrô, sang anŏ sĭ gơnam hăng hăng hơdôm anih sĭ mơdrô anet gêh gal amăng bruă čan prăk tañ hloh amăng bơyan anai.

“Tui tơlơi črâo trun mơng Sang bruă  prăk sĭ mơdrô pơčruih ngăn Tuh pơ alin hăng pơđĭ kyar Việt Nam (BIDV), ƀing gơmơi lêng kơ đing nao bruă brơi čan prăk amăng pơkra, sĭ mơdrô, sit biă ñu lĕ pơkra gơnam, sĭ mơdrô gơnam yua. Hăng bruă anai, sang bruă prăk ăt ƀu hơmâo tơlơi pơkă mrô prăk čan, kmlai lêng mă aset hloh amăng hơdôm jơlan hơdră brơi čan. Lơm hơdôm anih anom, sang anŏ hăng ƀing sĭ gơnam pơkŏn kiăng ƀing gơmơi amra pok pơhai hơdôm anung prăk čan tui hluai kiăng djru brơi hlơi kiăng”.

Tui jŭ yap mơng gơnong bruă tuh tia pơkra ming hăng sĭ mơdrô tơring čar Dak Lak, tơlơi kiăng blơi yua gơnam rĭm blan amăng tơring čar giăm 3.400 klai prăk. 1 blan hlâo kơ tết tui phiăn juăt Bính Ngọ 2026, gơnam ba sĭ him lăng giăm 30%, dưm dưm rơbêh 1.000 klai prăk, đing nao hơdôm gơnam juăt yua hơmâo añăm tam, boh troh, mơnuih ƀong huă, braih, sik, hra, sum ao, khŏ jĕp, tơpai ƀiêr, ia mơmih…

Ơi Nguyễn Hải Triều, kơ-iăng Khua gơnong bruă tuh tia pơkra ming hăng sĭ mơdrô tơring čar Dak Lak brơi thâo, kiăng pơhlôm brơi gơnam tam, nua sĭ gap ƀrô bơyan tết anai, gơnong bruă hơmâo git gai anom bruă wai lăng sĭ mơdrô hăng hơdôm anih anom bơdjơ̆ nao kơtưn pel ĕp hơdôm anih ba gơnam hyu sĭ, laih dong pơphô brơi Jơnum min mơnuih ƀôn sang tơring čar git gai hơdôm sang bruă prăk sĭ mơdrô brơi čan prăk mă kmlai ƀiă djru ngă hơđong nua gơnam.

“Amăng bruă pơhlôm djop gơnam sĭ mơdrô hăng hơđong nua amăng tơring čar, Jơnum min mơnuih ƀôn sang tơring čar Dak Lak hơmâo hră pơ-ar git gai 13 anom bruă sĭ mơdrô hơmâo hơdôm boh sang sĭ mơdrô pơprong, hơdôm anih anet ƀiă hơmâo Co.opmart, Go! Bách hoá xanh, VinMart…hrŏm hăng hơdôm anih sĭ mơdrô gơnam juăt yua mut hrŏm jơlan hơdră anai. Hrŏm hăng anun, gơnong bruă ăt brơi hơdôm anih anom pơphun jơnum sang čơ ƀơi Buôn Ma Thuột hăng hơdôm kual jum dar kiăng neh met wa dưi blơi gơnam tết”.

Ƀơi anăp kơ bruă mơnuih blơi gơnam lu bơyan tết, mơ̆ yua hơmâo tơlơi gơgrong pơhlôm djop gơnam, djru čan prăk truh pơ bruă wai lăng, bruă sĭ mơdrô gơnam Tết ƀơi Dak Lak amra pơhlôm hơđong. Gơnam sĭ mơdrô lu, nua hơmâo wai lăng kjăp djru brơi mơnuih ƀôn sang hơđong blơi gơnam. Sa bơyan ƀong tết dong bă blai, gêh gal glăk jê̆ giăm neh met wa ƀơi tơring čar Dak Lak./.