Ngă tui tơlơi pơtrun mơ̆ng Ping gah hăng Kơnuk kơna, amăng hơdôm thun rơgao, hơdôm boh tơring amăng kual Dap Kơdư ngă tŭ yua Jơlan hơdră dêh čar pơtrun hrŏ trun ƀun rin hơđong hăng Jơlan hơdră dêh čar pơtrun đĭ kyar bơwih ƀong huă - mơnuih mơnam plơi pla djuai ania ƀiă hăng čư̆ siăng. Mơ̆ng sang anŏ rin, amai H’Phương Knul (djuai Êđê), pơ ƀuôn Tuôr, să Hòa Phú, tơring čar Dak Lăk hơmâo kơnuk kơna djru čan prăk ƀong kơmlai aset đôč či bơwih ƀong tŭ yua, ră anai sang anŏ ñu bơwih ƀong hơđong, dưi ngă sang phrâo laih:“Hlâo adih sang anŏ gơmơi jing sang anŏ rin, ƀu hơmâo sang dŏ ôh. Kơnuk kơna djru ba ha bơnah, sang anŏ gơmơi dong pơgôp nao anun jing dưi ngă sang anai. Samơ bruă mă aka ƀu hơđong ôh, dŏ lo brơi ană bă hrăm hră dong. Kâo čang rơmang Kơnuk kơna lăng ba, djru brơi gơmơi hơmâo bruă mă hăng hơmâo prăk hơđong hloh, djru ba hơdôm boh sang anŏ dŏ tơnap amăng plơi”.

Jơnum ruah khua ping gah dêh čar tal 14 pơsit bruă kiăng ngă amăng 5 thun pơ anăp, mrô sang anŏ rin tui hơnong pơkă phrâo rơwang thun 2026-2030 hrŏ trun mơ̆ng 1 -1,5 puang amăng ha rơtuh rim thun. Ngă sit brơi jơlan ngă bruă anai, Tơlơi pơtrun Jơnum ruah khua ping gah tơring čar Dak Lăk rơwang thun 2025-2030 kiăng hrŏ trun mrô sang rin amăng tơring čar mơ̆ng 2%/thun pơ ngŏ; mrô sang anŏ rin djuai ania ƀiă hrŏ mơ̆ng 3%/thun pơ ngŏ. Kiăng dưi ngă, tơring čar djru brơi hlâo bruă bơwih ƀong, pơkra gơnam, pok prong hơbô̆ bruă hrŏ trun ƀun rin hơđong kơ rim plơi pla. Yă Nguyễn Thị Nguyên Thảo, Kơ-iăng khua Jơnum min mơnuih ƀôn sang tơring čar Dak Lăk brơi thâo:“Rơwang thun 2025-2030, tơring čar djru ngă amuñ brơi kiăng hơmâo prăk djru, brơi čan, hơdră djru mơnuih ƀôn sang; ngă tui Tơlơi pơčrâo trun 39 mơ̆ng Khul khua git gai Ping gah, pơđĭ tui boh tŭ yua mă prăk čan, ba prăk čan či ngă bruă, sĭ mơdrô, kiăng hơmâo tơlơi gêh găl či akŏ pơdong plơi pla phrâo, đĭ kyar bơwih ƀong huă - mơnuih mơnam kual mơnuih ƀôn sang djuai ƀiă, čư̆ siăng, pơhlom tơlơi hơdip mơda bơwih ƀong huă ƀơi tơring čar”.

Tơdơi kơ mông Jơnum ruah khua ping gah tal 14, Khánh Hòa prăp rơmet, ngă bruă tui pran jua “ruah mă djơ̆ - pok pơhai tañ - ngă khŏm giong - pơkă lăng hăng boh tŭ yua”, pơƀut ngă klă anih tuh pơ alin, pơtrut hơdôm bruă đĭ kyar tañ, đah mơ̆ng dưi akŏ pơdong ƀôn prong yua gơnong dlông wai lăng hlâo kơ thun 2030. Amăng git gai črâo bruă, Khua jơnum min mơnuih ƀôn sang tơring čar Khánh Hòa ơi Trần Phong lăi nao tơlơi kiăng ngă tañ, hơdeč hmar abih bang bruă akŏ phun; kiăng hơdôm gơnong bruă, anom bruă, plơi pla čih hơdră ngă bruă rơđah, pơƀut pơsir hĭ tơlơi dŏ gun, pơđĭ tui tơlơi bơkơtưn, pơhno, hăng anŏ klă bơwih brơi mơnuih ƀôn sang, anom mơdrô:“Mơ̆ng anai truh abih thun hăng mut amăng thun 2026, kiăng hơdôm gơnong bruă, plơi pla či pơkra hơdră ngă bruă rơđah tui rim blan, rim wơ̆t hrơi tơjuh; pơƀut pơsir brơi tơlơi gun, pơplih klă anih tuh pơ alin, dưi pơhno hăng ƀing gŏp, hăng anŏ klă bơwih brơi mơnuih ƀôn sang hăng anom sĭ mơdrô. Tui hluai kơ bruă hơmâo mơ̆ng rim anom bruă mơn, ƀing gih khŏm prăp rơmet hlâo ngă hiư̆m pă či pok pơhai”.

Amăng lu tơlơi gir anăp nao đĭ kyar 2 mrô, ba Khánh Hòa jing ƀôn prong yua Gơnong dlông wai lăng, bruă man pơdong jing yom biă mă. Khua Gơnong bruă Man pơdong tơring čar Khánh Hòa ơi Nguyễn Thành Phú brơi thâo, anom bruă amra pơƀut pơđĭ tui anŏ klă bruă dưm dăp, čuk pơka, đĭ kyar kơnar plơi prong hăng anih anom, jơlan nao rai phrâo hloh, bơwih brơi klă kơ tơlơi kiăng mơ̆ng tơring čar:“Ƀing gơmơi amra gir, hăng tơlơi pơmin kơđi čar prong hloh, pơƀut ngă djŏp bruă mơ̆ng Ping gah tơring čar, Jơnum min mơnuih ƀôn sang tơring čar jao; phun ñu lĕ pơđĭ tui anŏ klă bruă prăp rơmet, čuk pơkra, đĭ kyar dưm kơnar plơi prong hăng jơlan nao rai, pơlir hăng đĭ kyar mơtah, bơwih ƀong gah ia rơsĭ hăng tuai hyu ngui, pơtrut tơlơi đĭ kyar hrŏm kơ tơring čar mơtăm”.

Dap Kơdư hăng Dơnung Tong Krah jing kual giăm guai - bul pơtâo plao ia rơsĭ. Tơdơi kơ Jơnum ruah khua ping gah dêh čar tal 14 truh kih, Thượng tướng Đỗ Xuân Tụng, Ding kơna Ping gah, Kơ-iăng khua Anom bruă phun Kơđi čar Khul ling tơhan Việt Nam hơmâo ngă bruă ƀơi Anom bruă khua git gai tơhan pơgang guai tơring Dak Lăk, Thượng tướng kiăng Tơhan pơgang guai Dak Lăk pơthâo tañ, pok pơhai ba yua Tơlơi pơtrun Jơnum ping gah dêh čar tal 14 dưi ngă sit nik:“Blung hlâo khŏm sem lăng, pơthâo rơđah, ngă bruă sit kiăo tui Tơlơi pơtrun Jơnum ruah khua Ping gah dêh čar tal 14, ngă tui djơ̆ hăng tơlơi pơčrâo trun mơ̆ng Khua git gai Ping gah anun lĕ “2 kjăp tơlơi pơmin, 2 pơtrut kơtang, 2 pơhlom pơgang” hăng “5 kjăp”. Khua git gai ping gah lăi pơthâo tum teč đôč samơ̆ djŏp tơlơi či kiăng git gai Ling tơhan lăi hrŏm, hăng Tơhan pơgang guai lăi hơjăn”.

Ta ƀuh mơn, pran jua Jơnum ping gah dêh čar tal 14 glăk mut amăng tơlơi hơdip hăng jơlan ngă bruă rơđah rơđông, djơ̆ hăng tơlơi hơmâo sit ƀơi rim boh plơi pla, rim bruă mă. Abih bang glăk mut hrŏm hơyak hrŏm amăng hrơi mông ƀing ta glăk čơkă Ping gah, čơkă bơyan bơnga Bính Ngọ 2026./.