Hlâo kơ anun, jơnum pơčrông tal 1 pơsit mrô khua pơ ala mơnuih ƀôn sang dêh čar hơmâo ruah ƀơi tơring čar lĕ 15 čô, hơmâo 6 čô yua Gơnong dlông pơƀuh, hăng 9 čô yua tơring čar ruah đĭ; abih bang mrô mơnuih hơmâo tơbiă anăn ba ruah lĕ 28 čô. Kiăo tui tơlơi kah pơpha, Khul khua wai lăng djŏp djuai ania mơnuih mơnam Việt Nam tơring čar hơmâo mơit hră lăi pơthâo kơ 17 anom bruă či ba pơƀuh 22 čô. Truh 5mông tlam lơ 25/1/2026, Jơnum min djŏp djuai ania mơnuih mơnam tơring čar hơmâo mă djŏp laih hră pơ-ar ƀing tơbiă anăn. Jơnum anai pơsit anăn 22 čô khua tơbiă anăn ba ruah hăng sem lăng hơdôm tơlơi kiăng kơđiăng lui lơ̆m hơduah tơña mơnuih ƀôn sang ruah khua pơ plơi pla, anih dŏ mă bruă.

Pơhiăp ƀơi mông jơnum, yă Cao Thị Hòa An, Ding kơna Ping gah dêh čar, Kơ-iăng khua ping gah tơring čar, Khua Jơnum min pơ ala mơnuih ƀôn sang tơring čar, Khua Jơnum min ruah khua tơring čar Dak Lăk kiăng Khul khua apăn bruă Jơnum min djŏp djuai ania mơnuih mơnam Việt Nam tơring čar ngă hrŏm kjăp hăng hơdôm anom bruă bơdjơ̆ nao, pok pơhai ngă bruă djơ̆ tơlơi pơtrun pơčrông sai tŏ tui, pơhlôm dưi ngă pô, djơ̆ lăp, djơ̆ hrơi pơkă, hăng djơ̆ tơlơi phiăn./.