Pơphun mơng ră anai truh lơ 5 Tết, Jơnum ngui Tết Việt Quỹ Mão 2023 ƀuh rơđah hăng anih anom “Phố Ông Đồ” hăng năng ai ñu 50 čô mơnuih thâo čih bôh pia đưm hrom hăng ia hră hla pơ-ar mriah dô̆ čih bôh hră kơ tuai. Anih jơnum ngui dưi pơhrôp đĭ yua kơ rơbêh kơ 100 phun bơnga dar pơjing kiăng kơ hiam djru tuai lăng ƀuh mơ-ak bơyan bơnga amăng ƀôn prong djă anăn Wa Hồ.

Hrom hăng anun, ƀơi anai ăt pơphun mơn hơdôm bruă mă ngui ngor hrơi Tết kah hăng : Man rŭp tò he, trel rŭp, kač rŭp, anih ƀong huă hăng apui kơđen ia jâu, anih pơdă ao dai,... Ƀơi anai dô̆ hmâo lu bruă mă gum djru, bơwih brơi Tết kơ mơnuih ƀôn sang kah hăng: Jơlan hơdră “Rơdêh pơgiăng bơyan bơnga” ba čơđai gưl dlông glăi plơi ƀong Tết, “Rơdêh pơgiăng tum jơngum” kơ mơnuih mă bruă kơ sang măi glăi plơi, jơnum bưp ƀô̆ mơta čơđai gưl dlông čơkă Tết ataih mơng sang,... Amăng mông ngă lơphet pok phun, grŭp pơphun bruă hmâo ƀơk laih gơnam Tết truh hăng čơđai muai tơnap tap, čơđai drit druai yua kơ klin Covid-19./.