Tlam lơ 10/2, ƀơi Hà Nội, ƀrô bơyan prap čơkă thun phrâo Bính Ngọ 2026, Khua git gai Ping gah dêh čar ơi Tô Lâm, Khua git gai Ping gah ling tơhan, nao bưp hăng git gai mông bưp ƀô̆ mơta ƀing khua tơhan pơprong pơdơi lơtret laih. Amăng mông bưp, Khua git gai Ping gah pơpŭ hơ-ơč thun phrâo hiam drơi jăn pran jua kơ ƀing khua tơhan; laih dong lăi pơtong klah čun kơ bruă amăng rŏng lŏn tơnah, amăng kual, hơdôm tơlơi kơđŏm glăi amăng rơwang ngă bruă Jơnum tal XIII, boh than ba glăi mơng Jơnum tal XIV hăng hơdôm tơlơi pơplih phrâo amăng tơlơi pơmĭn, jơlan gah pơđĭ kyar lŏn ia pơ anăp dong.

Khua git gai Ping gah ơi Tô Lâm lăi pơtong tơlơi rơkâo tŏ tui pơjing ling tơhan ngă hơkrŭ, kjăp bruă, pơplih phrâo amăng rơnuk hrưn đĭ pô mơng djuai ania, lăp djơ̆ hăng tơlơi rơkâo wai pơgang lŏn ia amăng rơnuk phrâo. Khua git gai Ping gah đăo gơnang tơlơi pơmĭn kjăp bruă kơđi čar, tơlơi găn rơgao sit nik djop mơta, ƀing khua tơhan pơdơi lơtret laih amra tŏ tui pơgôp hiăp abih pran jua, tơpă sit brơi kơ bruă pơjing, pơplih pơkra amăng Ping gah, pơjing ling tơhan mơnuih ƀôn sang ngă bruă tơpă sit, hơđong kjăp, akĕ phĭ tui Ping gah, kơnuk kơna hăng mơnuih ƀôn sang.