Pơhiăp đĭ ƀơi mông jơnum, pơphun brơi bruă man pơdong sang hră gưl sa Cẩm Thạch, Khua dêh čar ơi Phạm Minh Chính lăi rơđah, anai jing sa bruă mă lăp hơdor pioh yom biă mă bă blai tơlơi khăp; ngă rơđah tui jơlan hơdră, hră pơtrun mơ̆ng Ping gah, kơnuk kơna, pơdah rai tơlơi đing nao, djru ba, tơlơi gir run khut khăt mơ̆ng tơring čar Thanh Hóa hăng tơlơi gum hrŏm mơ̆ng khul mơnuih mă bruă sĭ mơdrô amăng bruă djru hrŏm gah bruă pơtô hrăm, kiăng pơtrut tơlơi pơblih phrâo kơtang, pơđĭ boh tŭ yua pơtô hăng pơjuăt ƀơi tơring čar. Khua dêh čar pơtrun hiăp khom ngă giong sang hră anai hlâo kơ lơ 31/8/2026.

Lăi pơtong, thun blan pơ anăp, kiăng pơtrut tơlơi bơwih ƀong huă lĕ, khom pơđĭ tơlơi thâo, bruă ngă bơkơnar mơnuih mơnam, pơhrŏ ƀun rin hăng boh tŭ yua amăng tơlơi hơdip mơda, pran jua mơak amăng mơnuih ƀôn sang; djop mơta boh tơhnal pơđĭ kyar lêng anăp nao kơ mơnuih ƀôn sang yơh phun, Khua dêh čar ăt pơtă pơtăn pok pơhai ngă tui Hră pơtrun jơnum prong ping gah dêh čar tal XIV, Hră pơtrun mơ̆ng ping gah tơring čar Thanh Hóa rơwang bruă thun 2025-2030.