Nao lăng jơlan hơdră “Bơyan bơnga ling tơhan” thun 2026 ƀơi Quảng Trực, Đại tướng Nguyễn Trọng Nghĩa, Ding kơna Ding jum kơđi čar, Khua anom bruă kơđi čar ling tơhan mơnuih ƀôn sang Việt Nam, mơ-it nao tơlơi tơña bla, juh pơ alum pran jua ling tơhan-mơnuih ƀôn sang kual giăm guai tơring čar Lâm Đồng; laih dong tŭ yap, lăng yôm boh than ba glăi amăng pơhlôm rơnuk rơnua, hơđong hăng bruă djru brơi tơlơi hơdip mơnuih mơnam mơng Quân khu 7, sit biă ñu lĕ ƀơi kual ataih, asuek, kual giăm guai.

“Kâo hok mơ-ak biă mă lơm Quân khu 7 hăng Jơnum min mơnuih ƀôn sang tơring čar Lâm Đồng hơmâo jơlan hơdră sit nik, yôm phăn djru brơi neh met wa kual giăm guai amăng tơring čar. Kâo čang rơmang, Ping gah, gong gai, ling tơhan hăng mơnuih ƀôn sang tơring čar Lâm Đồng tŏ tui tơlơi gal, ngă tui pran bruă mă mơng 3 boh tơring čar Dak Nông, Lâm Đồng hăng Bình Thuận kiăng pơđĭ kyar ƀiă dong, pơhlôm bruă jao wai pơgang rơnuk rơnua, hơđong; neh met wa gir run bơwih ƀong ngă hmua, hrưn đĭ pơklaih mơng ƀun rin hăng pơdrong sah”.

Amăng jơlan hơdră “Bơyan bơnga ling tơhan”, Quân khu 7 hơmâo pok man pơdong kual plơi pla pơlir hơbit puih kơđong tơhan mơnuih ƀôn sang kual giăm guai, hăng prong 60 boh sang pơlir jê̆ giăm. Rĭm boh sang prong 90 met karê, hơmâo ring bruă jum dar sir kjăp, hơmâo lan sang, hơmâo apur tơnă hơbai hrŏm hăng sang yua pơkŏn. Anai lĕ sa amăng hơdôm boh sang anŏ arăng man pơdong brơi sang, ayong Điểu Cường, mơnuih djuai ania M’nông ƀơi ƀon Bu Nung, să Quảng Trực brơi thâo:

“Lơm thâo sang anŏ gơmơi hơmâo anăn amăng hơdôm sang anŏ arăng jao sang tal anai, ƀing gơmơi hok mơ-ak biă mă. Sang man pơdong prong rơhaih, sir kjăp, pơhlôm brơi anih dŏ brơi ƀing gơmơi. Ăt ƀu thâo lăi hơget lơi rơngiao kơ bơni Quân khu 7 hăng djop gưl, gơnong bruă. Sang anŏ gơmơi amra gir run bơwih ƀong huă, gum hrŏm hăng ling tơhan wai pơgang kjăp guai lŏn ia hăng plơi pla Quảng Trực.”

Să Quảng Trực prong giăm 559 km karê, prong tal dua đơ đam dêh čar, hăng giăm 40 km glông jơlan guai ha guai hăng tơring čar Mundulkiri (Kur). Să hơmâo giăm ha mơkrah mrô mơnuih lĕ djuai ania ƀiă. Trung tướng Lê Xuân Thế, khua anom bruă tơhan Quân khu 7 brơi thâo, bruă man pơdong hơdôm boh plơi pla pơlir hơbit puih kơđông tơhan-mơnuih ƀôn sang yôm phăn biă mă, pơhlôm amăng bruă wai pơgang guai lŏn ia:

“Hơmâo tơlơi gum hrŏm mơng djop gưl, gong gai djop ƀon lan, anom bruă git gai tơhan Quân khu hơmâo pok pơhai akŏ bruă lăng hơdôm kual plơi pla ngă akŏ, ƀơƀrư̆ pơđĭ kyar kual plơi pla rôk tui guai lŏn ia. Mơng anun, ling tơhan gơnang nao mơnuih ƀôn sang wai pơgang guai; mơnuih ƀôn sang gơnang nao ling tơhan bơwih ƀong ngă hmua, pơđĭ kyar bơwih ƀong huă, hơđong tơlơi hơdip, pơgôp wai pơgang kjăp guai lŏn ia tañ hloh, mơng ataih, pơjing pran đăo gơnang mơng mơnuih ƀôn sang kual giăm guai”./.