Ƀơi să Sa Loong, tơring čar Quảng Ngãi hmư̆ dik dak ngui čơkă thun phrâo yôm phăn-Bơyan bơnga giăm guai pơđao pran jua ană plơi pla. Jơlan hơdră yua anom bruă git gai ling tơhan wai pơgang guai Quảng Ngãi gum hrŏm hăng Jơnum min mơnuih ƀôn sang să Sa Loong pơphun, pơdah pran khăp ling tơhan mơnuih ƀôn sang kual giăm guai. Anom bruă tơhan wai pơgang guai tơring čar Quảng Ngãi hơmâo pơkiăo nao ƀing nai ia jrao, ơi ia jrao rơgơi nao khăm, črâo brơi bruă pơjrao hăng ƀơk jrao brơi neh met wa.

Yă Lường Thị Lá, dŏ amăng plơi Hào Phú, să Sa Loong brơi thâo:

“Kâo ruă kơtăng arăt drah, ruă tơlang tơleh, gah ƀơi tơkai tơngan dong. Kâo rai pơ anai khăm, hơmâo ling tơhan khăp pơjrao brơi, ƀơk jrao dong. Hơdôm tơlơi ruă kâo lăi pơthâo, hơmâo ƀing ơi ia jrao ƀơk brơi jrao mơñum. Mơng bơyan Tê̆t anai amăng pran jua ăt mơ-ak, hơmâo ling tơhan, sit biă ñu gơnong glông đing nao, kâo hok mơ-ak biă mă”.

Tơlơi ngui bơyan bơnga jai hrơi dik dak hăng hơdôm bruă klon ƀañ tek hăng sang čơ “0 prăk”. Ƀing ling tơhan giăm guai hrŏm hăng neh met wa klon rĭm boh ƀañ tek, ƀơk gơnam, ngă kơ mơnuih djuai ania ƀơi čơkă thun phrâo pơđao pran jua.

Amăng jơlan hơdră “Bơyan bơnga giăm guai pơđao pran jua mơnuih ƀôn sang” thun 2026, Khul git gai anom bruă tơhan wai pơgang guai Quảng Ngãi hrŏm hăng hơdôm anom bruă gum hrŏm ƀơk 450 anung gơnam, nua ñu giăm 300 klăk prăk djru hơdôm boh sang anŏ tui hơdră djru, sang anŏ ƀun rin hăng ƀing čơđai tơnap tap. Puih kơđong tơhan Sa Loong ăt djru brơi sa boh sang anŏ ƀun rin sa drơi rơmô ania, djru bơwih ƀong huă kiăng neh met wa hrưn đĭ pơklaih mơng ƀun rin. Đại tá Trương Thiên An, Khua git gai Ping gah, Khua anom bruă git gai ling tơhan wai pơgang guai tơring čar Quảng Ngãi brơi thâo:

“Mơng hơdôm jơlan hơdră, anom bruă git gai ling tơhan wai pơgang tơring čar Quảng Ngãi hơmâo djru ƀơk gơnam Tê̆t brơi giăm 2.000 boh sang anŏ djuai ania ƀiă tơnap tap, sang anŏ ƀun rin hăng sang anŏ tui hơdră djru amăng đơ đam ƀon lan; djru tơlơi hơdip ƀong rơbêh 10 boh sang anŏ. Ƀing čơđai sang hră amăng jơlan hơdră “Čung čơđai nao sang hră”, ƀing gơmơi jak iâu djop gơnam tam, prăk kak kiăng ƀing čơđai hơmâo tơlơi gal blơi pơhrua sum ao, hră, gai čih tŏ tui nao sang hră./.