Tal hơdor glăi 96 thun akŏ pơjing Ping gah Cộng sản Việt Nam, mơ-ak tơlơi truh kih mơng Jơnum tal 14 mơng Ping gah, prap čơkă thun phrâo tui phiăn juăt Bính Ngọ 2026, mơguah (10/2) Khua git gai Ping gah dêh čar ơi Tô Lâm nao tŭi ñang, dưm guang bơnga hơ-ŭ hơdor ƀing khua mua hơđăp mơng Ping gah hăng ƀing tơhan djai pơsăn drơi jăn ƀơi Hưng Yên hăng Bắc Ninh. Amăng hrơi mông pioh hơdor tơngia, ol kơdol, ƀơi anih pioh hơdor Khua git gai Ping gah dêh čar Nguyễn Văn Cừ (phường Phù Khê, tơring čar Bắc Ninh), Khua git gai Ping gah ơi Tô Lâm hrŏm hăng grup khua mua nao dưm guang bơnga, tŭi ñang hơ-ư̆ hơdor tơlơi gum pơgôp prong prin mơng Khua git gai Ping gah ơi Nguyễn Văn Cừ, mơnuih Cộng sản ba gru, mơnuih kơhnâo kơhnăk mơng djuai ania Việt Nam hăng plơi pla Bắc Ninh.

Ƀơi Anih pioh hơdor kơ Khua git gai Ping gah ơi Nguyễn Văn Linh (să Nguyễn Văn Linh, tơring čar Hưng Yên), Khua git gai Ping gah dêh čar ơi Tô Lâm hăng ƀing khua mua nao dưm guang bơnga, tŭ ñang pơdah pran pơpŭ bơni ƀơi anăp bơngăt atâo Khua git gai Ping gah Nguyễn Văn Linh, mơnuih Ping gah gir kơtir, abih pran ngă bruă, ngă bruă tui tơlơi pơmĭn rơngai djuai ania hăng chủ nghĩa xã hội, khua apăn bruă ngă bruă khut khăt, pơčeh phrâo, tui kru “Lăi hăng ngă”, mơnuih kiăo tui hrăm rơgơi hloh mơng Khua mir sir Hồ Chí Minh, mơnuih kơhnâo mơng plơi pla Hưng Yên.