Bơyan phang thun 1930, Ping gah Cộng sản Việt Nam dưi akŏ pơjing, djă pioh sa gru kơđŏm yom pơphăn amăng hơdôm hră čih pioh gru phun bruă hơkrŭ Việt Nam. Ƀơi mông jơnum, akŏ pơdong ping gah pơphun mơ̆ng lơ 6/1 truh lơ 7/2/1930, Ping gah Cộng sản Việt Nam hơmâo pơtong sit jơlan hơdră pơđĭ kyar mơ̆ng bruă hơkrŭ Việt Nam lĕ: Bơwih ƀong ngă pô kơ mơnuih ƀôn sang, khom hơmâo tơlơi dưi kiăng hơkrŭ hăng ngă bruă hơkrŭ kiăng pơgang lŏn ia pô pioh anăp nao tui jơlan hơdră mơnuih mơnam hơmâo dram gơnam hrŏm hơbit, ngă tui tơhnal pơkă “Rơngai kơ djuai ania hăng mơnuih mơnam ngă khua pô”. Hăng jơlan hơdră hơkrŭ djơ̆ lăp, thâo rơgơi laih anun pơčeh phrâo găl kơđi, mơ̆ng hrơi akŏ pơdong truh ră anai, Ping gah Cộng sản Việt Nam ta juăt lăi Ping gah Việt Nam tong ten kơjăp na nao hăng jơlan hơdră ruah mă laih, anun yơh hơmâo ngă lu boh tơhnal hing ang, đĭ nao akŏ pơdong lŏn ia Việt Nam pơdrong sah, lŏn ia kơtang, mơnuih ƀôn sang ngă pô, bơkơnar, rơgơi kơhnâo. Kơ-iăng nai tha prin, nai prin tha Bùi Đình Phong, Sang hră kơđi čar  Hồ Chí Minh lăi pơtong:

“95 thun laih rơgao gah yŭ kơ tơlơi git gai mơ̆ng Ping gah, ƀing ta hơmâo tŭ mă lu boh tơhnal lăp bơni prong kah hăng ră anai anun lĕ 3 mơta bruă phun. Mơta sa lĕ, khom lăi pơtong, ping gah ta git gai djơ̆ lăp, pơsit djop bruă dưi ngă amăng bruă hơkrŭ kơ lŏn ia. Mơta dua jing anŏ yom hloh lĕ ƀing ta hneč mă mông gêh găl, djă gai phun hla gru hiam kiăng pơklaih rơngai djuai ania hăng mơnuih mơnam ngă khua pô. Anai lĕ sa amăng bruă mă hrưn đĭ kơtang hloh pơdah thâo tơlơi pơtô djơ̆ mơ̆ Wa Hồ ba jơlan truh kơ ping gah laih anun hơmâo boh tơhnal tŭ yua sit nik. Tơlơi tal klâo dơ̆ng lĕ pran kơtang mơ̆ng mơnuih ƀôn sang jing phun kơ tơlơi dưi amăng djop bruă hơkrŭ”.

Hơdôm boh tơhnal dưi ngă amăng 95 thun laih rơgao jing atur kơjăp, pran jua mă bruă hur har kiăng ping gah dưi git gai lŏn ia anăp nao, lăng tui pơ anăp adih mut tơma amăng rơnuk pơblih hrưn đĭ phrâo mơ̆ng djuai ania. Kơ-iăng nai tha prin –nai prin tha Nguyễn Viết Thảo, ding kơna Khul nai pơtô pơdjơ̆ mơ̆ng dêh čar lăi:

“Tơhnal pơkă či ngă tui rơnuk hrưn đĭ pô mơ̆ng Việt Nam mơnuih mơnam ngă khua pô lĕ hing ang kơtang kơjăp, pơdrong sah, thâo rơgơi, dưi hmao hăng lu dêh čar amăng rŏng lŏn tơnah kah hăng Wa Hồ čang rơmang hăng lăi pơthâo amăng thun 1945, anun lĕ anăp kiăng nao truh. 2 tơhnal pơkă rơđah rơđong laih, truh thun 2030, khom jing lŏn ia pơđĭ kyar, hơmâo atur ngă bruă tuh tia pơkra ming phrâo, rơnoh prăk pơhrui glăi lu, kiăng truh thun 2045 jing lŏn ia mơnuih mơnam ngă khua pô bơkơnar pơđĭ kyar, pơdrong. Kâo kiăng lăi pơtong lĕ khom jing dêh čar mơnuih mơnam ngă khua pô, bơkơnar, mơnuih mơnam thâo rơgơi, hing ang pơdrong sah”.

Ƀơi mông jơnum bơkơtuai boh thâo phrâo, Khua sang hră kơđi čar Hồ Chí Minh ơi Nguyễn Xuân Thắng lăi lĕ, kiăng dưi ngă djop tơhnal pơkă truh thun 2030, lăng nao pơ anăp adih truh thun 2045, Ping gah kiăng pơblih phrâo kơtang hloh mơ̆ng tơlơi pơmin pơtrut bruă pơđĭ kyar, hơmâo anŏ pơblih kơtang hloh amăng bruă mă, dăp hơdră hlâo, kiăo tui pran jua thâo gum pơgôp ngă hrŏm kiăng ƀu kơdun ôh hăng bruă mă ia rơgơi tơlơi kơhnâo laih anun khom khin hơtai, kơjăp amăng bruă kơđi čar hăng bruă mă lăng nao pơ anăp adih djơ̆ jơlan hơdră, tơlơi pơtrun man pơphô mơ̆ng ping gah ta:

“Ping gah kiăng pơblih phrâo kơtang hloh amăng tơlơi pơmin pơđĭ kyar, jing khom hơmâo bruă mă pơblih kơtang sit nik pioh pơsit jơlan hơdră, bruă mă thâo pơčeh phrâo ƀu pơdơi ôh, kiăng pơđĭ tui pran jua laih anun tơlơi pơmin ƀuh, lăng nao pơ anăp adih tui bruă dăp hơdră mơ̆ng ping gah. Khom pơtô lăi, pơsit tong ten tơlơi pơmin anŏ kiăng abih bang thâo hluh rơđah mơ̆ng ping gah kiăng lĕ “pơđĭ kyar hmar hăng hơđong kơjăp lŏn ia”, amăng anun pơđĭ kyar bơwih ƀong huă mơnuih mơnam hăng pơgang ayuh hyiăng anih dŏ jum dar jing anŏ phun, akŏ pơdong ping gah ăt jing bruă mă phun kah hăng boh pia aliăng lơ̆m kơ aliăng, bruă phun lơ̆m kơ phun, kiăng anŏ yom hơmâo đut tơhnal laih anun pơđĭ kyar gru grua hiam hăng ană mơnuih yơh ngă atur. Anai lĕ phun tơdŭ boh tŭ yua anŏ kiăng amăng čơđeh asar, tơlơi kơtang amăng pran jua, phun kơ bruă mă hăng anŏ pơtrut pran jua mă bruă pơđĭ kyar”.

Pơhiăp ƀơi mông jơnum bơkơtuai, Khua anom pơtô bruă ping gah dêh čar ơi Nguyễn Trọng Nghĩa lăi pơtong, lăp pơ-ư ang biă mă gru grua găn rơgao 95 thun ping gah ta git gai lŏn ia ngă bruă hơkrŭ ƀơi Việt Nam, hăng bruă glăm ba prong prin gir run man pơdong, pơhrăm ba laih anun ngă bruă hơmâo ba glăi boh tŭ yua yom pơđom pioh rơnoh yom mơ̆ng Ping gah hơmâo ngă. Ơi Nguyễn Trọng Nghĩa đăo kơnang tal jơnum bơkơtuai anai hơmâo djru hrŏm kơ bruă kơsem min, pơtô pơblang, pơhrăm pran jua ai hơtai tơpă hiam tui Khua mir sir Hồ Chí Minh,  ƀing khua mua apăn bruă ngă hơkrŭ nao hlâo amăng dêh čar, hơdôm rơnuk gưl mơnuih ping gah tong ten, khin hơtai amăng bruă ngă hơkrŭ....kiăng hơmâo tơlơi rơnuk rơnua kơ ƀing ta ră anai. Kơtưn hrŏm pơbŭ tui ngă kơjăp hloh tơlơi pơmin pran jua, bruă ngă mơ̆ng ping gah, mơnuih ƀôn sang, ling tơhan, yua kiăng hơmâo lŏn ia Việt Nam rơnuk rơnua, rơngai mơai,  mơnuih ƀôn sang ngă khua pô, dêh čar pơdrong sah, thâo rơgơi, hyuk hyak mơak klă, kơjăp pran jua đĭ nao pơ anăp tui jơlan hơdră mơnuih mơnam bơkơnar.