Khua dêh čar lăi pơtong, akŏ bruă jơlan rơdêh đuăi hmar ƀôn prong Hồ Chí Minh-Thủ Dầu Một-Chơn Thành lĕ akŏ bruă tui tơlơi pơmĭn mơng Ping gah, pran jua mơnuih ƀôn sang, anai lĕ tơlơi pơđar tui pran jua kiăng hơdor tơngia mơnuih hơmâo tuh rơyuh pran jua yua kơ lŏn ia yua anun kiăng ngă pơgiong, anăm lăi đôč ôh, anăm ngă tơnap tap, anăm lăi mơ̆ ƀu ngă, anăm djưng djư, kiăng ngă tui khăt khăt, lơm pơhiăp amra ngă, lơm ngă kiăng brơi pơgiong.

“Kâo rơkâo hơdôm boh tơring čar Bình Phước, ƀôn prong Hồ Chí Minh, Bình Dương amăng rơwang anai lĕ kiăng pơgiong ngă hră pơ-ar tơkuh nao rai jơlan mơng Dak Nông nao pơ Chơn Thành. Anai lĕ tơlơi pơmĭn mơng Ping gah, pran jua mơng mơnuih ƀôn sang, mơnuih ƀôn sang dŏ tơguăn biă mă, bruă pơđĭ kyar kiăng ječ ameč. Yua anun, kâo rơkâo ƀing khua mua anăm djưng djư dong tah, hăng kiăng ngă tui tơlơi git gai mơng Khua dêh čar, ngă tui khut khăt, anăm pơhiăp giong pioh pơ anun, hăng pran jua lăi amra ngă, ƀuăn khŏm ngă, lơm ngă kiăng kơ pơgiong mơtăm, anai lĕ tơlơi pơđar mơng hơtai boh hăng ƀing ta kiăng pioh hơdor ƀing mơnuih rơngiă, ƀing tuh rơyuh pran jua brơi kual lŏn anai, kiăng hơmâo bruă ngă tong ten, anăm lăi mă đôč ôh hăng kiăng ngă brơi giong. Kâo rơkâo ƀing khua mua lăng glăi ngă hiưm pă lơ 2/9/2026 pioh hơdor glăi hrơi akŏ pơjing lŏn ia dưi mă yua, yua anun ƀing ta kiăng ngă ječ ameč”.

Khua dêh čar brơi thâo, đơ đam dêh čar glăk đing nao 3 tơlơi ngă ječ anun lĕ tañ hơmâo hơdră bruă, anih anom, hăng mơnuih mă bruă thâo rơgơi, Khua dêh čar čang rơmang tơring čar Bình Dương ba jơlan hlâo amăng 3 bruă ječ anai, sit biă ñu lĕ hơdră bruă kiăng pơgôp pơplih hơdră mơng ngă hrŏm tuh pơ alin kơnuk kơna hăng hajăn, tuh pơ alin kiăng pơsir hĭ hơdôm tơlơi gun, laih dong ba jơlan hlâo amăng pơđĭ kyar jơlan tơkuh nao rai kual.

Akŏ bruă jơlan rơdêh đuăi hmar ƀôn prong Hồ Chí Minh-Thủ Dầu Một-Chơn Thành ară jơlan găn nao tơring čar Bình Dương glông rơbêh 52 km, hơmâo dưm dăp man pơkra 6 bơnah jơlan rơdêh đuăi hmar, rơdêh dưi pơđuăi 100 km/h. Anai lĕ ară jơlan tơkuh nao rai ƀôn prong Hồ Chí Minh hăng Bình Dương, Bình Phước hăng tŏ tui tơkuh nao rai hăng jơlan rơdêh đuăi hmar Gia Nghĩa-Chơn Thành kiăng tơkuh nao rai hăng kual Dap kơdư.

Rơwang tal 1, akŏ bruă tuh pơ alin hăng 4 bơnah jơlan rơdêh đuăi hmar, bơnah brơi rơdêh dŏ glăi lơm hơmâo tơlơi ječ rôk jơlan, jơlan prong 25,5 met. Abih tih prăk tuh pơ alin rơbêh 8.833 klai prăk. hơmâo ngă tui hơdră tuh pơ alin kơnuk kơna-hajăn (PPP). Hrơi mông man pơkra 36 blan dong mơng hrơi hră pơkôl dưi ngă tui.

Jơlan rơdêh đuăi hmar ƀôn prong Hồ Chí Minh-Thủ Dầu Một-Chơn Thành tơkuh nao rai mơng jơlan wer 3 ƀôn prong Hồ Chí Minh nao pơ plơi prong Chơ Thành (tơring čar Bình Phước), ngă gêh gal kiăng pơđĭ kyar amăng kual Ngŏ dơnung, pok prong plơi prong hăng kual tuh tia pơkra ming. Lơm arăng jơlan rơdêh đuăi hmar Chơn Thành-Gia Nghĩa pơgiong, amra tŏ tui pơlir hăng kual Dap kơdư, ngă tơkuh nao rai amăng kual, pơtrut pơđĭ kyar bơwih ƀong huă-mơnuih mơnam, laih dong pơhlôm rơnuk rơnua, hơđong. Akŏ bruă anai pơgôp ngă tui hơnong pơkă 5.000 km jơlan rơdêh đuăi hmar mơ̆ Ping gah hăng Kơnuk kơna ba tơbiă man pơkra giong rơwang thun 2021-2030.

Khua dêh čar lăi pơtong, thun 2025 lĕ thun yak nao tañ, anăp nao Jơnum Ping gah đơ đam dêh čar tal XIV, Khua dêh čar rơkâo tơring čar Bình Dương pơphun klă Jơnum Ping gah djop gưl; pơphun klă hơdôm hrơi ngă yang prong, hrơi pioh hơdor prong amăng lŏn ia; pơgôp pok pơhai tơlơi klah čun ngă tui tơlơi pơtrun 18 mơng gơnong glông kơ bruă dưm dăp hơbot anih anom, pel ĕp glăi hơdôm hơnong pơkă, bruă jao kiăng ngă klă ƀiă dong, boh than amăng thun 2025 prong ƀiă thun 2024 hăng pơgiong hơdôm hơnong pơkă, bruă jao amăng ha rơwang.

Hăng glông kơnong rơbêh 50 km, Khua dêh čar rơkâo, kiăng tañ ƀiă amăng man pơkra, pơphun ngă 3 ca 4 kíp, huă ječ pơdơi hmar kiăng truh lơ 2/9/2026 dưi pok mă yua jơlan kiăng ngă gêh gal pơđĭ kyar, Khua dêh čar đăo gơnang djop ding jum, gơnong bruă, ƀon lan amra dưi ngă.

Khua dêh čar rơkâo ƀôn prong Hồ Chí Minh, Bình Dương, Bình Phước, Tây Ninh kiăng ngă tui khăt khăt djơ̆ hrơi mông, pơhlôm brơi kjăp, hiam hăng kiăng bơwih brơi tơlơi hơdip mơda kơ mơnuih ƀôn sang yua jao glăi lŏn brơi akŏ bruă anai, hăng pran jua anih dŏ phrâo kiăng klă ƀiă anih hơđăp, laih dong pơgăn bruă ngă soh, hưp ƀong kông ngăn, ngă bruă brơi tơpă, yua mơnuih ƀôn sang, yua kơ tơlơi pơđĭ kyar amăng lŏn ia ta./.