Anom bruă pioh kơ hlăk ai tơdăm ngek dra mua Dak Lak prong 3 ha, ƀơi phường Tự An, plơi prong Ƀuôn Ma Thuôt. Ring bruă anai hơmâo sa boh sang ngă lu bruă, pơdong sang dlông 2 tal, đơ đam prong 3000 m2; sa boh dơnao luai ia  hăng dua ruăi sang juă glai, pơblih sum ao či luai ia; tơdron lan sang prong 1.500 m2 hăng đing ia rô đuăi, pơnăng sang, war pơga jum dar. Ring bruă anai tuh pơ alin truh 62 klai prăk. Man pơdong mơ̆ng thun 2013 truh thun 2017 ngă giong. Samơ̆, ring bruă anai lui hĭ soh sel truh ră anai ƀu mă yua ôh. Ơi Võ Đình Thuận, mơnuih mă bruă dŏ wai pơgang anom bruă anai lăi:

“Kâo mă bruă dŏ wai lăng pơ anai 5 thun laih, ƀuh sui ha wơ̆t hơmâo jơnum 1-2 wơ̆t đôč. Dơ̆ng mơ̆ng hrơi kâo rai mă bruă ƀu hơmâo apui lơtrik, ia yua ôh, khom nao rơkâo ia mơnuih ƀôn sang ieo gah či yua. Ring bruă răm tui laih, ia ƀruač mơ̆ng anih bơbung tal 2 pơngŏ anun, bơbung sang lĕ angin pưh rơbŭ ngă tơpŏk laih".

Ring bruă dưi man pơdong ƀơi đơ đam lŏn prong lui hĭ soh sel, anun yơh mơnuih ƀôn sang hneč mă ngă anih ƀhu gơnam đang hmua hăng jing lan kiă rơmô. Amai Nguyễn Thị Thanh Mai, sang giăm anom bruă hlăk ai tơring čar Dak Lak brơi thâo:

“Kâo ƀuh ƀiă đôč arăng rai mă bruă, hlâo kơ klin kheng Covid lĕ ƀuh mơ̆n khul hlăk ai tơdăm dra mut phung rai pơphun hơdră adoh suang 1-2 wơ̆t thơ, tơdơi kơ anun ƀu ƀuh dơ̆ng tah. Ƀuh lui soh sel đôč, mơnuih ƀôn sang nao phai rơmô, kơbâo amăng lan sang anun, sui ƀiă mơnuih ƀôn sang ba nao ƀhu gơnam đang hmua”.

H’Giang Niê, Khua git gai hlăk ai tơdăm dra mut phung tơring čar Dak Lak lăi, Anom bruă pioh kơ hlăk tơdăm ngek dra muai tơring čar Dak Lak ƀu mă bruă ôh amăng 5 thun rơgao. Ră anai, lu črăn amăng anun răm hĭ laih. Phun ñu lĕ yua kơƀah tơlơi phiăn mă bruă, ƀu akŏ pơjing khul mơnuih mă bruă git gai wai lăng ôh. Anom bruă git gai tơdăm dra mut phung tơring čar hlăk dŏ kơƀah 18 čô mơnuih mă bruă, amăng anun tơlơi phiăn phrâo aka ƀu brơi akŏ pơjing anom bruă phrâo ôh. Rơngiao kơ anun, lơ̆m ring bruă man pơdong giong thun 2017, lu arăt jơlan nao rai amăng kual anai aka ƀu giong ôh.

H’Giang Niê brơi thâo, anom bruă git gai tơdăm dra mut phung tơring čar rơkâo, Jơnum min mơnuih ƀôn sang tơring čar Dak Lak pơhrua dơ̆ng rơnoh prăk ming pơkra glăi hơdôm črăn bvruă răm; laih dơ̆ng pơhrua dơ̆ng mrô mơnuih mă bruă kiăng akŏ pơdong sang bruă anai; ngă hrom djop khul grup, anom bruă, gong gai kơnuk kơna ngă hrom kiăng anom bruă anai dưi pơphun bruă mă sit nik.

“Ƀing gơmơi hơmâo git gai Anom bruă tơdăm dra mut phung Ƀuôn Ma Thuôt ngă hrom tơring čar kiăng gum hrom ngă tui hơdôm bruă jao kơ hlăk ai tơdăm dra mut phung djơ̆ lăp. Gum hrom Jơnum min mơnuih ƀôn sang phường Tự An pơtô lăi, mơnuih ƀôn sang anăm ba nao rơmô kơbao kiăng amăng lan sang bruă, laih anun anăm ba ƀhu gơnam đang hmua lan simăng. Rơngiao kơ anun, Anom bruă git gai tơdăm dra mut phung ăt pơtô lăi mơnuih ƀôn sang giăm anun, anăm brơi ană bă mut nao amăng kual pơkra dơnao luai ia kiăng huăi hơmâo tơlơi truh sat”