Thun 2022 phrâo rơgao, ñu dưi hơmâo Khul khua mua apăn bruă hlăk tơdăm dra mut phung rơnuk Hồ Chí Minh dêh čar apah bơni hăng pri anăn Lương Định Của laih anun dưi hơmâo Jơnum min mơnuih ƀôn sang tơring čar Kon Tum pơpŭ hăng anăn bơni Ƀô̆ mơta hlăk ai ba gru hlâo.

Anom ngă ƀong hrom ngă hmua ba yua boh thâo ia rơgơi pơlir hơbit Farm yua kơ Tô Linh Bình, 29 thun ngă Khua khul git gai ngă rah khua anom bruă gơñu pơdong ƀơi plơi thôn 5, să Hà Mòn, tơring glông Đak Hà, tơring čar Kon Tum. Samơ̆ anom ngă ƀong hrom gơñu pơphun bruă mă pơ lu anih amăng tơring čar, kah hăng pơ Đak Hà, Ngọc Hồi, Đak Tô, Kon Braih, Sa Thầy, plơi prong Kon Tum laih anun hơmâo mơ̆n pơ sa dua boh anih ƀơi tơring čar Gia Lai.

Kiăng pơsir anŏ ataih nao rai, pơlir hơbit, akŏ pơjing bruă ngă hrom tong ten kơplah wah ƀing ngă ding kơna, ayong Tô Linh Bình brơi thâo, abih bang 30 čô ding kơna lêng kơ thâo rơđah bruă ba yua boh thâo ia rơgơi tơlơi pơhing:

“Boh thâo ia rơgơi tơlơi pơhing brơi kơ ta amuñ hloh hăng ƀu kơƀah ôh bruă kiăng ngă hmua pla pơjing. Ƀing gơyut dŏ pơ ataih pơtruh nao rai hăng Zalo, Facebook, laih anun akŏ pơjing ngă grup hrom amăng măi telephôn, amăng tơlơi pơhing rĭm čô. Pơjing plang fanpage lĕ kiăng pơtruh nao rai re se tơlơi pơhing, rup gơnam, video pơdah thâo gơnam sĭ mơdrô, boh čroh đang hmua brơi abih bang ĕp lăng hrăm nao rai tơdruă tơlơi thâo thăi”.

Tui hăng Tô Linh Bình, ñu gir run hơduah ĕp hơdră ngă hmua rơgoh hơdjă lĕ yua tơlơi ñu tom găn rơgao laih, ñu ƀuh, lơ̆m akŏ pơjing sang anŏ prô̆ ƀong, ñu khom pơdong sang amăng đang boh čroh hmua samơ̆ ƀâo mơnâo ia jrao pruih pơgang phun pla. Laih ñu ĕp hơdră jơlan ngă phrâo phara ƀiă, ñu ba anŏ kiăng kah pơpha hăng mơnuih ngă hmua pơkŏn, pơčrông sai ngă hmua tui hơdră rơgoh hơdjă kiăng pơgang tơlơi suaih pral kơ abih bang mơnuih mơnam. Ră anai, 30 čô ding kơna amăng ngă ƀong hrom ñu, pơphun ngă hmua lir hơbit hăng anăn ba yua boh thâo ia rơgơi ngă hmua Farm, ngă hmua pla pơjing amăng 50 ha đang kơphê, rơbêh 70 ha boh sầu riêng hrom hăng hơdôm hơpluh ha đang boh čroh pơkŏn, ngă tui djơ̆ tơlơi pơkă ngă hmua rơgoh ƀu pruih lu ia jrao pơdjai hlăt kman ƀudah dưm kmơ̆k jrao ôh, kơnong dưm kmơ̆k, hơbâo pruai djah djâo, hla kyâo brŭ. Tơlơi pơhing mơ̆ng hmua rĭm čô ngă ding kơna khom lăi pơthâo tong ten. Hơmâo tơlơi hơgĕt phrâo, pơtruh brơi nao rai mơtam, djru brơi tơlơi thâo thăi mơ̆ng lu bruă ngă hmua anom ngă ƀong hrom pơkŏn.

Ayong Lê Quốc Hòa, sang ñu pơ plơi thôn 2, să Đak Ui, tơring glông Đak Hà brơi thâo, anŏ gêh găl biă mă ñu ƀing ngă ding kơna anom ngă ƀong hrom amra dưi hơmâo tơlơi djru mơ̆ng ataih, djop mông mơit sit kiăng hơmâo mơnuih lăi pơthâo mơtam:

“Kâo pla 2 ha boh sầu riêng hrom đang boh mit. Ngă tui hơdră ngă hmua rơgoh ƀuh hơdjă kiăng pơgang ayuh hyiăng lŏn mơnai glai klô anih dŏ. Kơnang tơlơi pơhing mơnuih mơnam hơmâo khul grup pơkĕ hrom tơlơi pơhing mŏng anom ngă ƀong hrom dŏng anun adơi ayong pơtruh nao rai djru ba amuñ gêh găl. Ƀơi anŏ tơlơi hơgĕt ta kiăng lĕ iâu telephôn, ta iâu hăng facebook pơhiăp nao rai huăi huač prăk kăk. Kiăng mông hơƀơi hrơi pơpă dưi soh, djop pô abih pran jua djru lăi pơthâo brơi hmao kru”.

Ră anai djop mơta gơnam sĭ mơdrô kơphê, boh sầu riêng hrom hăng lu mơta boh čroh pơkŏn mơ̆ng anom ngă ƀong hrom Pơlir hơbit Farm, ba sĭ mơdrô ƀu djop ôh hăng anŏ arăng kiăng rơkâo blơi.

Hrom hơbit găn rơgao tơlơi tơnap tap, djop ding kơna ngă ƀong hrom ră anai gum hrom ăt ngă tui akŏ bruă djơ̆ lăp hăng tong ten kơ bruă ngă hmua hơdjă rơgoh. Ƀơi anăp mơta, anom ngă hrom pok prong dơ̆ng đơ đam ngă hmua pruih ia đuăi hơjăn, laih dơ̆ng čih mrô lăi pơthâo kual ngă hmua pla pơjing kiăng ta ba hyu sĭ mơdrô nao pơ ataih. Hrom hăng mă yua mrô  boh thâo ia rơgơi ngă hmua pla pơjing, krăo lăng anŏ pơblih rĭm mơta boh čroh kiăng kơ mơnuih blơi yua amuñ hloh, ĕp thâo phun tơdŭ, anih pla, kơtưn brưa juâ̆t ngă, jing gru grua thâo thăi hiam klă pơthâo kơ rĭm mơta gơnam ba sĭ mơdrô.

Lăi nao kơ mơnuih ngă khua anom bruă, ba jơlan kơ anom ngă ƀong hrom ba yua boh thâo ia rơgơi pơlir hơbit Farm, ayong Tô Lin Bình, ayong A Xây, Kơ-iăng Khua git gai anom bruă tơdăm dra mut phung tơring čar Kon Tum brơi thâo:

"Amăng bruă ngă hmua rơgoh hơdjă, mơtah mơda, ayong Tô Linh Bình hơmâo lu hơbô̆ bruă, lu bruă ngă phara biă mă, kah pơpha hrom lu tơdăm dra, pơsir bruă mă kơ ƀing tơdăm dra mut phung dŏ tơnap tap. Hơdôm thun rơgao, ayong Bình ăt hơmâo tŭ mă lu tơlơi apah bơni”.

Thun 2022, hăng Anom ngă ƀong hrom bruă hmua rơgoh ba yua boh thâo ia rơgơi Pơlir hơbit Farm phrâo hăng tŭ yua lu, ayong Tô Linh Bình dưi tŭ mă lu tơlơi mơak prong, hing ang, hăng pri apah bơni djă anăn Lương Định Của pioh kơ mơnuih ngă hmua thun hlăk ai-jing mơnuih ngă bruă mơdrô pơphun bruă mă ngă hmua rơgơi amăng dêh čar. Ăt amăng thun 2022 mơ̆n ayong Tô Linh Bình dưi hơmâo Jơnum min mơnuih ƀôn sang tơring čar Kon Tum apah bơni hăng anăn gru hlăk ai ba jơlan hlâo tơring čar Kon Tum amăng bruă mă, pơkra ming hăng sĭ mơdrô.