Amăng anih mă bruă mơ̆ng Anom bruă ngă hră pơ-ar să Trường Xuân (Lâm Đồng), tơlơi ră ruai kơ mă yua ia rơgơi mrô mơ̆ng măi telephôn djă ƀơi tơngan sa čô mơnuih mă bruă thun hlăk ai. Nguyễn Đức Anh Tuấn, mơnuih apăn bruă măi mok boh thâo mơ̆ng Anom bruă Gru grua - Mơnuih mơnam, mơta dŏ lăng nao pơ măi, tut na nao ƀơi măi telephôn. Tơkeng thun 1999, Tuấn jing sa čô mơnuih hơdip amăng rơnuk hơmâo internet, hơmâo boh thâo mrô. Samơ̆ tơlơi yom hloh lĕ Tuấn djă ba tơlơi thâo rơgơi mơ̆ng ñu či djru pơkra brơi anŏ tơnap ƀơi sa boh să kual 3 tơnap tap hloh: “Kâo glăk pơkra brơi să Trường Xuân sa mini app ƀơi zalo či pơplih bruă ngă hră. Kiăo tui tơlơi pơmin bơwih brơi mơnuih ƀôn sang klă hloh. Yua dah, ră anai abih bang mơnuih ƀôn sang leng kơ hơmâo telephôn rơgơi soh, bơ zalo lĕ ta yua lu mơn, lơ̆m rai pơ să Trường Xuân, mut amăng mini app amuñ, gêh găl hloh”.

Hiăp rah, Tuấn pok rah sa mini app ñu phrâo pơkra, pơmut amăng zalo. App anai yua amuñ đôč, samơ̆ djŏp tơlơi amăng anun kiăo tui tơlơi kiăng sit mơ̆ng mơnuih ƀôn sang pơ kual čư̆ siăng. Gư̆ mă ƀiă đôč, mơnuih ƀôn sang dưi mut truh pơ glông bơwih brơi ngă hră dêh čar, mut ĕp lăng hră pơ-ar, ngă hră thun tơkeng, ngă hră anih dŏ phun, anih dŏ jăng jai.

Ơi Lê Xuân Thuận, Khua jơnum min mơnuih ƀôn sang să Trường Xuân brơi thâo, mơ̆ng mini app yua hlăk ai pơkra, să lông yua lăng amăng sang să. Hrŏm hăng anun, să pơphun ngă lăng hlâo hơbô̆ bruă Grup mă yua ia rơgơ mrô ƀơi 9  boh plơi ataih mơ̆ng sang să. Lơ̆m ƀuh anŏ tŭ yua, să amra pok prong ƀơi 19 boh plơi hlao. Yua dah pơ anai lŏn prong, plơi pla dŏ ataih, jing anai yơh hơdră ngă bruă lăp djơ̆ kiăng ba yua boh thâo mrô jê̆ giăm mơnuih ƀôn sang hloh: “Ƀơi să hơmâo sa grup hlăk ai, ta lăi pơthâo anŏ ta či kiăng lĕ ba yua ia rơgơi mrô, hiư̆m pă kiăng mơnuih ƀôn sang thâo mă yua djŏp bruă ƀơi telephôn ƀudah amăng măi computer, jŭ yap mă hơdôm bruă ngă amuñ hloh đôč. Ră anai mơnuih ƀôn sang mă yua lu hloh ăt lĕ zalo mơn, jing ta mă zalo yơh či pơmut app. Mơ̆ng anun, Tuấn pơkra app anai laih anun ta čih anăn mă yua ha wơ̆t hăg Zalo lĕ 20 klăk, mă mơ̆ng prăk djru tui Tơlơi pơtrun 57”.

Yang hrơi tlam laih, ƀơi sa boh sang mơdrô gơnam ƀong či thôn 2 (să Trường Xuân, tơring čar Lâm Đồng), hơmâo sa Grup ba yua ia rơgơi mrô glăk mă bruă. Sang mơdrô anai pơdơi sĭ sui laih, samơ̆ amăng lăm ăt dŏ hơmâo mơnuih mơn, hiăp tlao hao hač. Hơdôm čô mơnuih glăk dŏ lăng amăng măi telephôn, đa hơmâo pơtô mut hiư̆m pă, đah mă tơbiă hră pơ-ar amăng măi, đa hrăm sem lăng hră pơ-ar. Yă Dương Thị Yến Thuỷ, mơnuih amăng thôn 2, nao pơ anun kiăng pơtô ba pơmut anăn amăng hră akŏ sang kơ ană đah kơmơi ñu: “Kâo rai pơ anai kiăng Pô wai lăng grup anai pơtô brơi kâo pơmut anăn ană kâo amăng hră akŏ sang, yua dah anăn ñu hơmâo ƀơi dua akŏ sang. Hră akŏ sang phrâo hăng hră akŏ sang hơđăp leng kơ hơmâo soh, anun jing kâo kơnang kơ ƀing adơi ayong pơtô lŏm hĭ ha sa. Mơ̆ng blung lĕ aka ƀu thâo ngă ôh, samơ̆ ƀing gơñu pơtô brơi, jing kâo thâo hĭ laih”.

Pô pơtô brơi neh met wa lĕ ayong Thân Thanh Chương, Kơ-iăng khua plơi, Khua grup mă yua ia rơgơi mrô thôn 2. Ñu djă telephôn pơtô brơi, pơblang brơi mơtăm yơh, pơtô mơ̆ng ƀrư̆ kiăng mơnuih ƀôn sang thâo hluh. Tơlơi hiam lĕ, hơbô̆ bruă anai glăk djru abih bang mơnuih ƀôn sang hor či hrăm mă pô: “Grup hrăm giong anun pơtô glăi, pơtô brơi hơdôm khul kah hăng khul hlăk ai, jơnum min djŏp djuai ania, tơdơi kơ anun lĕ neh met wa hlơi či kiăng hrăm. Mơnuih thâo pơtô brơi mơnuih aka ƀu thâo, ƀơ ƀrư̆ hnun yơh, ta pơtô ba đôč, ƀu djơ̆ ngă brơi hlao ôh, kiăng mơnuih ƀôn sang hlong ngă mă, hnun kah gơñu mơ̆ng thâo ngă, bang hyu boh thâo mrô, hăng anŏ gêl găl mơ̆ng boh thâo ia rơgơi”.

Amai Lê Anh Tiến, mơnuih apăn bruă boh thâo ia rơgơi Anom bruă Gru grua - Mơnuih mơnam să Trường Xuân brơi thâo, bruă mă mơ̆ng ƀing mă bruă pơ să lu biă, lơ̆m anun mơnuih mă bruă aset. Yua hnun, hơdôm Grup ba yua ia rơgơi mrô glăk jing “tơhan tŏ glông tui” djru pơsir lu bruă amăng plơi mơtăm. Tui hăng amai Tiến, lơ̆m mơnuih ƀôn sang thâo ngă mă pô, thâo djru nao rai, anun kah ia rơgơi mrô sit nik mut amăng tơlơi hơdip mơda: “Hơdôm grup ia rơgơi mrô djru ba klă biă kơ mơnuih ƀôn sang. Blung a ƀuh anŏ tŭ yua. Kơnong kơ rơbêh 1 wơ̆t hrơi tơjuh đôč, 9 boh plơi hơmâo rơbêh 118 wơ̆t čô mơnuih ƀôn sang tơki nao djru, pơtô brơi ngă hră amăng glông ngă hră mơ̆ng ataih. Hơmâo lu mơnuih dưi ngă hră pơ-ar”.

Mah dŏ tơnap kơ anih mă bruă, gơnam yua, ană mơnuih mă bruă, samơ̆ tơlơi gêh găl prong hloh mơ̆ng să Trường Xuân, tơring čar Lâm Đồng lĕ hơmâo ƀing mă bruă thun hlăk ai, hur har pran jua, huăi hŭi či pơplih phrâo ôh. Ngă tui Tơlơi pơtrun 57 mơ̆ng Ding jum kơđi čar jing bruă dŏ sui đôč. Samơ̆ yom hloh lĕ să pơplih laih tơlơi pơmin, khin pơmin, khin ngă laih anun lông ngă lăng hơdră ngă bruă phrâo. Lơ̆m mơ̆ng gơnong dlông hăng tơring čar hơmâo thim lu tơlơi pơtrun, hơdră ngă bruă lăp djơ̆ kơ mơnuih mă bruă, prăk kăk, anih anom mă bruă, jing gưl să sit nik jing anih giăm mơnuih ƀôn sang, pơsir brơi klă hloh djŏp tơlơi kiăng mơ̆ng mơnuih ƀôn sang./.