Amăng mrô rơbêh 2.470 boh sang bruă hăng lŏn đang sang bruă kơnuk kơna, hơmâo rơbêh 2.090 boh sang bruă ăt dŏ mă yua, mrô dŏ glăi hlăk jŭ yap glăi, mă glăi, pơhrui abih pioh yua kơ bruă pơkŏn, jao glăi kơ să, plơi pla wai lăng.

Tơring čar Khánh Hòa hơmâo akŏ pơjing grup hyu sem lăng, pơpha djuai kông ngăn, sang bruă jao kơ anom bruă hơmâo tơlơi dưi wai lăng. Tui hăng gơnong bruă prăk kăk tơring čar Khánh Hòa, bruă pơsir hĭ 370 mơta kông ngăn ƀu kiăng yua ƀudah mă yua ƀu glăi boh tŭ yua lĕ, ră anai gun hĭ, yua gơnong dlông pơtrun hiăp brơi lui hĭ pơjuă nua sĭ mơdrô sang bruă, lŏn kơnuk kơna rơbêh. Ră anai, tơring čar pơtrun hiăp jŭ yap glăi abih gơnam hlăk dŏ mă yua, pơtong glăi boh tŭ yua ñu, giong anun jao kơsem min hơdră pok pơhai djơ̆ găl brơi apah yua, ngă hrŏm, pơlir hơbit pơblih yua djơ̆ anŏ gêh găl bơwih brơi kơ bruă pơtô hrăm, pơtô pơjuăt, gru grua…