Amăng rơwang phrâo, Jơnum min mơnuih ƀon sang tơring čar Dak Lak rơkâo Kơnuk kơna kơtưn yua apui lơtrik mơng angĭn, apui lơtrik mơng yang hrơi amăng tơring čar, nua blơi apui lơtrik mơng angĭn amăng akŏ bruă apui lơtrik VIII; tañ tŭ yap akŏ bruă apui lơtrik mrô VIII hăng blơi apui lơtrik hrĭp pơ-iă yang hrơi, blơi apui lơtrik mơng angĭn; tañ ba tơbiă hơdră bơkơtưn hăng nua sĭ apui lơtrik  hăng hơdôm akŏ bruă apui lơtrik hrĭp pơ-iă yang hrơi, apui lơtrik angĭn.

Đĭ pơhiăp amăng mông krăo ăng, yă Lê Thị Thanh Xuân, Kơ-iăng Khua grup Khua pơ ala mơnuih ƀon sang tơring čar Dak Lak rơkâo Jơnum min mơnuih ƀon sang tơring čar pơhrua tong ten tơlơi ba tơbiă, tơlơi rơkâo kiăng grup sem lăng, pơƀut glăi lăi pơthâo boh tơhnal amăng Jơnum grup kiăng pơsir hĭ hơdôm tơlơi tơnap tap, gun găn ngă gêh gal pơđĭ kyar bơwih ƀong huă- mơnuih mơnam ƀơi ƀon lan. Laih dong, rơkâo Jơnum min mơnuih ƀon sang tơring čar kơtưn bruă wai lăng kơnuk kơna lơ̆m ngă tui hơdră bruă, tơlơi phiăn amăng pơđĭ kyar ƀơi ƀon lan mơng bruă pel ĕp, krăo lăng.