Hăng lu mrô khua mua pơ ala tŭ ư, ƀing pơ ala mơnuih ƀôn sang dêh čar hlong pơsit hĭ laih Tơlơi phiăn Jơlan glông hăng Tơlơi phiăn rơnuk rơnua ƀơi jơlan glông. Ƀơi anăp kơ tơlơi pơgôp hiăp dŏ phara đơi amăng glông 2, mơta tơlơi 9, pơkă kơ hnong ƀâo mơnâo ia tơpai ƀudah lăi hnong ăng kôl mơ̆ng pô mơgăt rơdêh, ƀing pơ ala mơnuih ƀôn sang dêh čar plĕ hră pơsit hĭ tơlơi anai phara hơjăn. Boh tơhnal pơsit, lu khua mua pơ ala tŭ ư hăng tơlơi pơkă: Kŏm mơgăt rơdêh rô nao rai ƀơi jơlan glông tơdah amăng drah hăng ƀâo mơnâo amăng bah pô mơgăt hơmâo hnong ia tơpai đôm.

Ƀuh rơđah thun blan rơgao, lu čơđai muai arăng wor rơbit hĭ amăng rơdêh, lơ̆m pô mơgăt rơdêh hyu pơgiăng čơđai sang hră, ba truh tơlơi hơmâo lăp hŭi lĕ, ngă kơ čơđai tơl djai amăng rơdêh, anun Jơnum min apăn bruă phun pơ ala mơnuih ƀôn sang dêh čar brơi pơhrua nao dơ̆ng tơlơi pơtrun phrâo amăng Hơdrôm hră Tơlơi phiăn Rơnuk rơnua rô nao rai ƀơi jơlan glông, jing rơdêh ôtô arăng apah pơgiăng ba nao hăng čơkă čơđai sang hră, čơđai anet gưl muai ƀudah rơdêh pơgiăng tuai hăng pơgiăng čơđai sang hră lĕ khom hơmâo măi ĕp lăng ƀuh rup, ƀuh video pioh lăng sŭ tơdah hơmâo tơlơi hơgĕt thâo râ̆o pơthâo hmao kru hăng pô mơgăt rơdêh.