Tơdơi kơ klâo hrơi mă bruă hăng lu boh yôm phun, biă mă ñu bruă mă ruah khua, tui hăng hơdră mă bruă, hrơi anai, lơ 23/5, ƀing pơ ala mơnuih ƀôn sang dêh čar mă bruă hrơi tal pă Jơnum lok 7 khua mua pơ ala tal XV hăng bruă pơčrong sai amăng grup kơ bruă: Pơtong glăi hăng pơhrua dơ̆ng boh tơhnal ngă tui pơđĭ kyar bơwih ƀong huă mơnuih mơnam laih anun yua prăk kơnuk kơna thun 2023’ pơtong glăi bruă mă amăng thun 2024.

Mơguah, ƀing pơ ala pơčrong sai nao rai amăng grup hăng bruă mă pơkrem yua prăk, pơgăn yua prăk phăk phai thun 2023; Boh tơhnal ngă tui tơhnal dêh čar pơtrun kơ bruă ngă bơkơnar đah rơkơi hăng đah kơmơi thun 2023. Či tlam lĕ, ƀing pơ ala pơčrong sai ƀơi sang jơnum prong kơ boh tơhnal krăo lăng pơsir hơdôm tơlơi rơkâo mơ̆ng mơnuih ƀôn sang ruah khua mơ-it kơ ƀing pơ ala mơnuih ƀôn sang dêh čar jơnum lok 6, khua mua pơ ala tal XV; ding kơna amăng kơnuk kơna dêh čar laih anun djop anom bruă, khua hơmâo anăn lăi pơthâo, pơblang rơđah hơdôm tơlơi mơ̆ ƀing pơ ala lăi pơthâo.