Tơdơi kơ rơbêh 20 thun ba sang anŏ nao pơ Dak Lak hơdip, truh ră anai tơhan hơđăp Vũ Văn Khanh dŏ amăng ƀut plơi 7, să Ea Nam, tơring glông Ea Hleo, tơring čar Dak Lak hơmâo drông war, đang hmua lu djuai phun pla, hlô rông. Hăng 12 ektar đang hmua, ñu pla pơplah lu phun hơmâo kơsu, tiu, boh ñông, boh mit, sầu riêng; rông wŏt hlô mơnong, dơnao ia rông akan hăng pioh pruih brơi phun tiu. Mơng đang hmua anai, rĭm thun ñu dưi pơhrui glăi rơbêh 1 klai prăk; pơhlôm brơi bruă mă kơ 10 čô mơnuih. Ơi Vũ Văn Khanh brơi thâo:

“Ngă tui gru grua ling tơhan tơdơi kơ hơdôm thun tơlơi bơwih ƀong huă bưp tơnap tap ră anai glăk ƀơƀrư̆ hrưn đĭ hơđong tui. Lơm tơlơi hơdip hơđong laih, kâo ăt djru brơi hơdôm boh sang anŏ pơkŏn, pơhmutu lĕ djru ia pruih brơi mơnuih djuai ania ƀiă jum dar anai, amăng thun anai djru brơi hơdôm hơpluh ektar. Amăng plơi pla aka ƀu hơmâo sang jơnum, kâo djru brơi giăm 1.000 met karê lŏn kiăng man pơdong sang jơnum plơi brơi kơ neh met wa ƀơi anai”.

Ñu lĕ tơhan hơđăp djru wai pơgang guai gah kơdư, tơdơi kơ hrơi pơklaih rơngai, ơi Nguyễn Đình Chiến tơbiă mơng plơi pla ƀơi Quảng Ninh nao hơdip bơwih ƀong pơ An Lạc, plơi prong Buôn Hồ. Tơdơi kơ hơdôm thun gir run bơwih ƀong, pơđĭ kyar bơwih ƀong huă. Truh ră anai ñu hơmâo laih sa boh sang uă tơpung kơphê, pok anih sĭ mơdrô gơnam ngă hmua, pơhrui glăi rơbêh 1,5 klai prăk rĭm thun. Gir run bơwih ƀong, samơ̆ ơi Chiến ăt mut hrŏm amăng hơdôm bruă ƀơi ƀon lan, djru brơi hơdôm boh tơnap tap bơwih ƀong huă, djru brơi gơnam ngă đang hmua tuh pơ alin huăi mă kmlai. Tơhan hơđăp Nguyễn Đình Chiến brơi thâo:

“Hrăm tui tơlơi pơtô mơng wa Hô kiăng thâo khăp pap ƀing gŏp, gum pơgôp, djru tơdruă amăng hơdôm bruă pơhrŏ trun ƀun rin. Ƀuh lu sang anŏ hơpă tơnap tap khŏm djru brơi, ĕp brơi bruă mă kơ ƀing ană čô ding kơna. Pơ alum pran jua ding kơna mut hrŏm lăp djơ̆, hrăm tui tơlơi phiăn, man pơdong plơi pla phrâo laih dong pơjing kual plơi pla hơdip hiam klă”.

Ngă tui tơlơi jak iâu “Tơhan hơđăp bơwih ƀong rơgơi-Thâo khăp pap ƀing gŏp”, ƀơi Dak Lak hơmâo lu hơbô̆ bruă bơwih ƀong amăng pơkra gơnam đang hmua, pla pơjing pơlir hăng rông hlô mơnong, sĭ mơdrô gơnam…Amăng 5 thun rơgao, hơmâo laih 50 boh sang anŏ hăng anom bơwih ƀong hrŏm gah ngă hmua bơwih ƀong rơgơi yua tơhan hơđăp ngă pô hơmâo arăng tŭ yap, ĕp brơi bruă mă kơ giăm 200 čô tơhan hơđăp hăng mơnuih amăng sang anŏ.

Tui yă Trần Thị Xuân, Khua khul tơhan hơđăp tơring čar Dak Lak, hrŏm hăng djru bơwih ƀong huă, ƀing ding kơna ăt gir run pơgôp pơjing keh prăk djru tơdruă, juăt djru brơi prăk yua bruă mă amăng khul, djru brơi sang anŏ tơnap tap, dju djuam duam ruă.

“Tui tơlơi pơphun “Tơhan hơđăp bơwih ƀong rơgơi, thâo khăp pap ƀing gŏp” hăng tơlơi pơphun “Yua kơ pran khăp pap tơdruă, rĭm čô ding kơna ngă lu bruă klă”, anai lĕ 2 tơlơi pơphun yôm hloh mơ̆ tơhan hơđăp juăt pơphun kiăng hrăm tui, pơphun pơplông mơng Khul gưl tơring čar truh pơ ƀon lan. Amăng tơlơi pơphun “Tơhan hơđăp bơwih ƀong rơgơi, thâo khăp pap ƀing gŏp”, tui ră anai amăng tơlơi hơdip, tơhan hơđăp hơpă dŏ añrăng găng ăt mut hrŏm bơwih ƀong huă kiăng pơgôp amăng pơđĭ kyar bơwih ƀong huă, gru grua mơnuih mơnam amăng ƀon lan”.

Ngă tui tơlơi pơtô mơng Wa Hô, “Ƀu hơmâo bruă hơget tơnap, hŭi ƀu gir run, klơi čư̆ hăng dor ia rơsĭ, gur run ăt dưi mơn”, tơdơi kơ pơgiong bruă jao hăng lŏn ia, pot glăi pơ plơi pla, ƀing tơhan hơđăp ƀơi Dak Lak tŏ tui pran jua ba jơlan hlâo amăng djop mơta bruă. Ƀing gơñu ăt gir run mut hrŏm pơđĭ kyar bơwih ƀong huă hăng pơgôp amăng pơjing tơlơi hơdip hiam klă amăng plơi pla ala ƀon./.