Khua mir sir pơdah tơlơi hok mơ-ak ƀơi anăp tơlơi yak nao pơđĭ kyar kơtang kơplah wah dêh čar Việt Nam-Australia amăng thun blan rơgao, sit biă ñu lĕ bruă dua bơnah pơtrut ngă hrŏm djop mơta amăng blan 3/2024. Khua mir sir rơkâo, hluai tui hơdôm hơdră rô nao rai phrâo, dua bơnah tŏ tui ba tơbiă hơdôm jơlan hơdră, akŏ bruă ngă hrŏm tong ten; tŏ tui pơlăi nao rai, pơbưp nao rai khua mua, kơtưn pơlăi nao rai hơdôm bruă amăng kual, jar kmar dua bơnah đing nao; ngă hrŏm bơwih ƀong huă, sĭ mơdrô-tuh pơ alin; pơtrut kơtang ngă hrŏm amăng djop mơta bruă phrâo hơmâo pơgang ayuh hyiăng pơplih sat, apui lơtrik hơdjă, yua boh thâo phrâo, boh thâo ia rơgơi.

Khua mir sir hok mơ-ak lơm hơdôm sang bruă gưl prong Australia pok prong pơlir hơbit hăng Việt Nam, lăng yôm dêh čar Australia tŏ tui djru prăk hrăm hră brơi Việt Nam, rơkâo Kơnuk kơna Australia tŏ tui ngă gêh gal brơi mơnuih ƀôn sang Việt Nam dưi hrăm hră, dŏ hơdip hăng mă bruă ƀơi Australia.