Tal pơplông thun anai, tơring čar Dak Nông hơmâo 21 bit anih (sang hră) pơphun bruă pơplông, 344 boh anih mut pơplông. Pơplông amăng mơguah tom brơi, hơmâo 4 čô čơđai sang hră hơmâo tơlơi truh rơdêh pơjrŏm hăng ruă nuă, dưi djru ba nao ăt gir pơplông. Amăng anun hơmâo 3 čô čơđai hơmâo tơlơi truh rơdêh pơjrŏm hlâo kơ hrơi pơplông lêng pơ tơring glông Dak Mil. Ƀing čơđai anai, hơmâo tơhan kông an pŭ, pi ba nao truh pơ anih mut pơplông yua aka ƀu thâo rơbat.

Sa čô čơđai ƀơi sang hră gưl klâo anih pơplông pơ să Quảng Phú, tơring glông Krông Knô, yua duăm ƀlĕ pơđeh, ƀlĕ hmơi mơ̆ng hlâo kơ hrơi pơplông mơ̆n, samơ̆ dưi pơphun brơi anih pơplông hơjăn ñu. Mơguah tom brơi, hơmâo 7.577 čô čơđai sang hră ƀơi Dak Nông mut pơplông tơlơi hrăm Ngư̆ văn. Tơlơi pơplông blung a pơphun rơnuk rơnua mơak klă. Tơlơi tơña pioh pơplông Ngữ Văn lu čơđai sang hră lăi huăi gleh đơi lơi, thâo mơ̆n pơblang tơlơi hrăm, amra lu puăng.