Ƀôn prong hơmâo 22/22 boh kuận, tơring glông, plơi prong Thủ Đức hăng 281/312 boh să, phường, tơring kual čih pơkra hăng lăi pơthâo hơdôm bruă ngă hing ang mơng Ping gah, gru grua ngă hơkrŭ mơng rơwang thun 1930-1975 truh ră anai. Samơ̆, amăng bruă ngă tui tơlơi črâo trun mrô 20 mơng Khul apăn bruă Ping gah dêh čar ƀơi ƀôn prong Hồ Chí Minh ăt dŏ lu bruă aka ƀu klă anun lĕ: Bruă dưm dăp mơnuih apăn bruă, sa amăng hơdôm bruă pơtô bruă Ping gah ƀu hơmâo biên chế brơi ƀing mơnuih gah gơnong bruă gru grua Ping gah.

Đĭ pơhiăp amăng mông jơnum, ơi Nguyễn Hồ Hải, Kơ-iăng Khua git gai Ping gah ƀôn prong rơkâo: Pơ anăp anai, hơdôm anom bruă kiăng tŏ ngă tui hăng pơsir hĭ hơdôm bruă aka ƀu klă ră anai. Ngă hiưm pă kiăng bruă čih pơkra tơlơi lăi pơthâo, pơtô pơjuăt gru grua Ping gah jai hrơi klă tui, lăp djơ̆ hăng rĭm čô mơnuih, sit biă ñu rơnuk hlăk ai. Hơmâo hơdôm boh tơhnal git gai kiăng mơnuih ƀon sang hluh rơđah gru grua hăng gir run ngă tui bruă anai.