Hơdôm hrơi rơnuč thun, bruă bơwih ƀong ƀuh dik dak amăng plơi Đăk Mế, să giăm guai Pờ Y, tơring glông Ngọc Hồi, tơring čar Kon Tum. Hrŏm hăng bruă pơhrui gơnam đang hmua, mơnuih ƀon sang plơi Đăk Mế ăt đing nao rơmet pơagaih sang hăng blơi mơnong ƀong huă pioh čơkă thun tui phiăn juăt Quý Mão. Tha plơi Y Pan brơi thâo, mơnuih djuai ania B’râu hơmâo kơnong 173 boh sang anŏ hăng giăm 600 čô mơnuih, dŏ hơdip amăng plơi Đăk Mế. Čơkă thun phrâo anai mơnuih djuai ania B’râu hơmâo lu tơlơi hok mơ-ak phrâo.

“Djuai ania B’râu pla kơphê, kơsu laih dong ngă hmua pơdai ia, sa boh sang anŏ pơhrui ƀiă biă mă ñu 6 tơ̆n. Rông kơbao rơmô, un mơnŭ pơhrui hơmâo biă mă. Tơlơi hơdip amăng sang anŏ djuai ania B’râu ră anai lĕ jơnap yơh. Tơlơi bơwih ƀong huă hơđong hăng pơđĭ kyar”.

Kar kăi hăng plơi Đăk Mế, hrơi mông prap čơkă thun phrâo, ngui bơyan bơnga ăt glăk ƀuh amăng 7 ƀut plơi pla dŏ glăi amăng să giăm guai Pờ Y, tơring glông Ngọc Hồi, tơring čar Kon Tum. Thiếu tá Nguyễn Văn Hiền. Kơ-iăng khua git gai anom bruă tơhan wai pơgang amăng jang Bờ Y brơi thâo:

“Anom bruă gum hrŏm kjăp hăng gưl Ping gah, gong gai ƀon lan pơphun hrơi tuk ƀañ tek, jơlan hơdră ngui bơyan bơnga kual giăm guai ngă pơđao amăng pran jua ană plơi pla, mơng anun kiăng mơnuih ƀon sang hlơi hlơi lông kơ dưi čơkă tết mơ-ak. Hơdôm boh sang anŏ ƀun rin, giăm ƀun rin ƀu hơmâo ƀañ tek, ƀing gơmơi gum hrŏm hăng hơdôm boh plơi pla pơphun tuk ƀañ tek ƀơk brơi kơ neh met wa amăng hrơi čơkă thun phrâo tui phiăn juăt anai”.

Kiăng kơ dưm čơkă thun phrâo mơ-ak ƀơi kual giăm guai, hrŏm hăng bruă jao wai pơgang guai lŏn ia, ƀing apăn bruă, ling tơhan ƀơi hơdôm puih kơđông tơhan tơring čar Kon Tum ăt pơgôp prong prin amăng bruă pơđĭ kyar bơwih ƀong huă – mơnuih mơnam kual giăm guai. Jơlan hơdră “čung čơđai nao sang hră’’; hơdôm hơbô̆ bruă djru brơi mơnuih ƀon sang pơđĭ kyar bơwih ƀong huă, pơhrŏ trun ƀun rin…ngă tui tŭ yua lĕ gru grua pơhlôm kjăp pran khăp pap kơplah wah ling tơhan hăng mơnuih ƀon sang kual giăm guai. Ayong A Hai, Măng Tách, să Đăk Long, tơring glông Đăk Glei hur har lơ̆m lăi nao tơlơi hơdip hơmâo lu pơplih phrâo mơng 67 boh sang anŏ amăng plơi pla:

“Hlâo adih neh met wa aka ƀu thâo bơwih ƀong huă, aka ƀu yua boh thâo phrâo yua anun rĭm thun rin rơpa, kơƀah djop mơta. Đa hơmâo ƀing apăn bruă, ling tơhan črâo ba neh met wa bơwih ƀong, pơđĭ kyar pla kơphê yua anun truh ră anai neh met wa jơnap yơh. Lu anŏ pơplih phrâo pơhmu hăng hlâo adih. Neh met wa thâo hluh, thâo ngă. Sang dŏ ră anai man pơdong prong. Lu sang anŏ blơi rơdêh, tơlơi hơdip đĭ đăi yơh”.

Nao pơ glông guai lŏn ia ataih rơbêh 292 km ha guai hăng dêh čar Lao, Kur ară găn nao tơring čar Kon Tum hơdôm hrơi giăm tết ƀuh pran mut hrŏm kơplah wah ling tơhan hăng mơnuih ƀon sang kual giăm guai. Thượng tá Nguyễn Văn Ngự, Khua puih kơđông tơhan wai pơgang guai Đăk Long, anom bruă pơdong amăng să Đăk Long, tơring glông Đăk Glei brơi thâo, bruă pơphun brơi mơnuih ƀon sang ƀơi 9 boh plơi pla amăng să čơkă thun phrâo kar hăng sô hơđăp, anai lĕ tơlơi gơgrong, hăng pran khăp pap mơng ling tơhan:

“Ƀing gơmơi gum hrŏm hăng hơdôm khul grup ƀơi ƀon lan pơphun hơdôm mông pơbưp, ngui adôh suang, bơrơguăt drơi jăn hăng pơphun lu bruă mă čơkă thun phrâo, ngui bơyan bơnga hăng pran jua mơ-ak samơ̆ ƀu wơr lơi bruă jao. Ƀing gơmơi pơpha ƀing apăn bruă Ping gah nao tơl plơi pla čơkă thun phrâo hrŏm hăng mơnuih ƀon sang, pơhlôm hơđong brơi mơnuih ƀon sang čơkă tết mơ-ak, rơnuk rơnua, thâo pơkrem. Hăng hơdôm sang anŏ ƀun rin, ƀing gơmơi jak iâu gum pơgôp kiăng ƀơk brơi gơnam kơ neh met wa kiăng kơ hrơi ƀong tết hơmâo mơnong, ƀañ ƀong.’’

Čơkă hrơi mông pơkuh nao rai kơplah wah thun sô Nhâm Dần 2022 hăng thun phrâo Quý Mão 2023, mơnuih ƀon sang, gong gai hrŏm hăng ƀing apăn bruă, ling tơhan wai pơgang glông guai hăng dêh čar Lao, Kur glăk pơphun lu bruă mă pioh čơkă tết mơ-ak mơ-ai, tơlơi hok mơ-ak ăt prong tui lơ̆m pơđut hĭ thun 2022 hơmâo 6 amăng 13 boh să kual giăm guai tơring čar Kon Tum dưi đĭ plơi pla phrâo hrŏm hăng anun lĕ glông guai lŏn ia hơmâo wai pơgang kjăp, tơlơi bơwih ƀong huă-mơnuih mơnam kual giăm guai pơđĭ kyar. Anai lĕ phun akha yôm phăn kiăng mơnuih ƀon sang, gong gai hrŏm hăng ling tơhan kual giăm guai Kon Tum tŏ ngă kjăp tui./.