Rơngiao kơ anun, djop anih tuai hyu ngui amăng bơyan phang anai, Đà Lạt-Lâm Đồng hơmâo pơhrôp glăi hiam hăng pok bah amăng hyu ngui ĕp lăng plơi pla bơnga bơwih brơi, pơhưč tuai rơnguai nao lăng hăng dŏ hrom pô hmua.

Rơbêh 1 blan hăng anai tơdơi kơ pok pơhai Festival bơnga Đà Lạt tal 9 thun 2022, tuai nao ngui pơ plơi prong anai jai hrơi lu. Ƀơi plơi bơnga Dă Thiện, sa amăng 5 boh plơi gru grua pla bơnga ƀơi Đà Lạt, tuai hyu ngui nao ĕp lăng amăng đang hmua, lu pơjeh bơnga blang hiam biă mă, hrom mơnuih ngă hmua pô pla bơnga, wai lăng đang hmua. Tuai hyu ngui ơi Trần Thanh Trà, mơ̆ng ƀôn prong Hồ Chí Minh, lăi nao kơ bruă ñu ĕp lăng đang bơnga anun hok mơak lăi:

“Ƀuh anih anom amăng đang bơnga hiam biă mă, djơ̆ arăng lăi plơi prong bơnga hăng tơlơi khăp biă mă. Ta lăi biă ñu rĭm kơ djuai bơnga lĕ hơmâo sa mơnâo ƀâo hiam, sa ia iom, ia anŏ hiam phara mơ̆n....hăng abih bang lêng kơ hyơr soh, lăng hiam biă mă, bơngač hăng mơda”.

Hrom hăng plơi bơnga Dă Thiên, hơdôm plơi bơnga kah hăng Xuân Thành, Vạn Thành, Thái Phiên, Hà Đông hăng plơi prong Đà Lạt ăt dăp brơi lu djuai bơnga hiam kiăng ngă gêh găl kơ tuai nao ĕp lăng. Ơi Vũ Anh Dũng, dŏ pơ plơi Hà Đông, phường 8, plơi prong Đà Lạt, brơi thâo, mơnuih ƀôn sang amăng plơi pla hơmâo ming pơkra pơhrôp hiam jơlan glông, anih pioh tuai hyu ĕp lăng hăng dăp djop djuai bơnga hiam:

“Plơi ngă sa hnong bruă gơmơi pơphun brơi tuai hyu ngui ĕp lăng đang bơnga. Sit hơmâo tuai kiăng hyu ĕp lang, hơmâo mơnuih ba hyu tua djop anih tuai kiăng hyu ĕp. Tuai kiăng nao lăng đang bơnga cúc hă hơmâo mơnuih ba hyu mơtam hăng pơtô brơi tum teč kơ tuai. Ta dưi lăi, pran jua mơnuih ƀôn sang hok mơak biă mă lơ̆m pơphun bruă ba tuai hyu ngui ĕp lăng plơi bơnga tui anai”.

Lơ̆m nao pơ plơi bơnga, ƀing tuai amra hyu ĕp lăng bruă mơnuih ngă hmua pla pơjing, tơña hơdră ngă hmua pla bơnga, wai lăng đang bơnga, añăm pơtam, hơbơi pơtơi, boh čroh phun ƀơi Đà Lạt. Rơngiao kơ anun, ƀing tuai hyu ngui ĕp anih pla boh kơbuă prang mriah hur, mut nao pĕ boh ƀong hăng tla prăk hơdôm ta kiăng ta blơi pĕ mă. Pơ anai, hơmâo lu anih hyu ngui lăng hmua mơ̆ng lu kông ty, sang bruă sĭ mơdrô ba hyu tuai. Tui hăng ơi Nguyễn Hùng Vỹ, plơi bơnga Vạn Thành, bruă ba tuai hyu ngui plơi bơnga pok rai sa bruă mă phrâo djru kơ mơnuih ƀôn sang amăng plơi pla. Yua kơ gơnam anun mơnuih ƀôn sang pô ngă, pô pơjing, arăng nao tơña, ĕp lăng kiăng thâo hăng lăi pơthâo anih anom blơi, ba glăi rơnoh hơđong kơ mơnuih ngă hmua pla bơnga. Hrom hăng anun, lu tuai weh nao ngui amra hơmâo lu bruă mă, sĭ mơdrô pơkŏn nao hrom pơđĭ kyar. Ơi Nguyễn Hùng Vỹ, lăi:

“Tuai hyu ngui ĕp lăng đang hmua plơi Vạn Thành lĕ hlăk pơđĭ kyar klă biă mă, ba glăi boh tŭ yua bơwih ƀong huă prong. Plơi prong ăt hlăk pơtrut mơnuih ƀôn sang, ngă gêh găl kơ mơnuih ƀôn sang plơi bơnga ăt kah hăng sang bruă sĭ mơdrô amăng plơi prong pơđĭ kyar ba tuai hyu ngui ĕp lăng đang hmua. Ngă hrom bruă tuai čuă ngui laih anun pla bơnga pioh sĭ mơdrô jơlan hơdră anai ƀuh tŭ yua biă mă”.

Tui hăng ơi Tôn Thiện San, Khua jơnum min mơnuih ƀôn sang plơi prong Đà Lạt, amăngtal Festival bơnga Đà Lạt tal 9 hăng têt thun anai, plơi prong pơphun hơdră anăn “Đà Lạt-Tuai čuă ngui plơi bơnga”, kiăng lăi pơthâo, gru grua phun akŏ pơjing rai, anih lŏn mơnai glai klô ană mơnuih pla bơnga brơi kơ tuai thâo. Anai lĕ mông gêh găl pioh kơ bruă pơtrut pơsur, jak iâu sang bruă sĭ mơdrô, mơnuih ƀôn sang pơkơtưn nao rai mă bruă pla bơnga, tuh pơ alin kơ bruă ngă hmua pla bơnga pioh sĭ mơdrô, ba tuai hyu ngui ĕp lăng. Ơi Tôn Thiện San brơi thâo, pơmin nao pơ anăp adih, plơi prong amra pơkă hnong pơđĭ kyar djơ̆ hơdră hloh hơbô̆ bruă ba tuai hyu ngui djơh hăng anai kiăng pơđĭ tui boh tơhnal bơwih ƀong huă mơnuih mơnam:

“Djop plơi bơnga phrâo pơphun bruă mă blung a đôč, ƀing gơmơi hlăk pơkă anih pơjing khul plơi bơnga, pơkă anih pơkă hnong pơsit plơi bơnga djơ̆ rơ-ua hiam klă hloh. Gơmơi akŏ pơjing plơi bơnga, hơmâo gơnam sĭ mơdrô bơwih brơi kơ tuai hyu ngui sit nik, ba glăi boh tŭ yua kơ plơi pla anun.

Blung hlâo lĕ, khom hơmâo gơnam mơ̆ng plơi bơnga, bơhmutu, plơi bơnga Vạn Thành ră anai lu tuai nao ngui hơmâo anih hyu ngui dŏ glăi amăng mlam. Hrom hăng anun, sang bruă sĭ mơdrô tuh pơ alin, plơi prong djru brơi tơlơi pơhing pôr pơthâo, djru prăk dưm truă pul apui rô nao rai ƀơi jơlan bơnga hơmâo anih tuai hyu ngui amăng mlam”.

Hăng hơdôm anăp ngă bruă pơkă hnong, laih dơ̆ng pơtrut ba yua boh thâo ia rơgơi phrâo ngă hmua pla bơnga, sit mơ̆n plơi bơnga ƀơi Đà Lạt amra pơtrut kơtang hloh hăng hơđong kjăp, ngă hiam tui dơ̆ng anih anom pla bơnga hmư̆ hing anai.