Hơmâo lu tơlơi dưm kơnar amăng dua wŏt ƀuh rơdêh pơjrŏm amăng mơmŏt lơ 12 hăng lơ 14/2 laih rơgao amăng jơlan Hồ Chí Minh, găn nao ară jơlan tơring glông Đăk Glei hăng jơlan 40B, ară jơlan găn nao tơring glông Đăk Tô, tơring čar Kon Tum, anun lĕ: Dua wŏt rơdêh blư̆ ngă 3 čô mơnuih glai, 4 čô mơnuih rơka; dua čô mơnuih mơgăt rơdêh lêng mơng tơring čar pơkŏn, sa čô dŏ mơng tơring čar Thanh Hoá hăng sa čô mơng tơring čar Long An. Hrŏm hăng bruă aka ƀu juăt jơlan nao rai, tui thượng tá Nguyễn Xuân Hướng, kơ-iăng khua anom bruă tơhan pôlih, Kông ang tơring čar Kon Tum, mơnuih hơmâo sui thun kiăo tui wai lăng, pơsir hĭ hơdôm bruă rơdêh pơjrŏm ngă djai mơnuih amăng tơring čar Kon Tum, tơlơi soh lu lĕ yua ƀu rang kơđiăng lơ̆m đuăi rơdêh amăng jơlan glông.

“Ƀing gơmơi ƀuh tal rơdêh pơjrŏm anai lĕ yua mơnuih mơgăt rơdêh aka ƀu rang kơđiăng. Tal sa lĕ ƀu đuăi gap ƀrô. Dua dong ƀing gơñu lĕ hăt he đơi. Đa hơmâo ară jơlan mơ̆ ƀing mơgăt rơdêh đuăi jê̆ giăm đơi, đa hơmâo mơnuih hăt he đơi đuăi rơgao hĭ glông arăng rek ngă ƀu hmao lơ̆m weh hĭ, hơdôm jơlan kơčep, đa hơmâo rơdêh đuăi mut nao jơlan rơdêh pơkŏn”.

Ăt tui thượng tá Nguyễn Xuân Hướng amăng hơdôm ară jơlan găn nao rai amăng tơring čar Kon Tum hơmâo lu ară jơlan čun čoe hŭi rơhyưt biă mă, ƀing mơnuih mơgăt rơdêh kiăng rang kơđiăng, anai lĕ: jơlan čun čoe Lò Xo, kơtuai tui ară jơlan Hồ Chí Minh; jơlan čun čoe Văng Rơi, kơtuai tui ară jơlan 40B; jơlan čun čoe Măng Đen, Vi Ô Lắc kơtuai tui ară jơlan mrô 24; Ngọc Vin amăng ară jơlan 14C...Thượng tá Nguyễn Xuân Hướng brơi thâo, ƀơi anăp kơ hơdôm tal ƀuh rơdêh pơjrŏm ngă djai mơnuih amăng hơdôm ară jơlan ƀơi tơring čar hơdôm hrơi giăm anai, tơhan pôlih wai lăng jơlan glông hơmâo kơtưn amăng bruă črâo ba hăng pơhŭi hlâo brơi ƀing mơgăt rơdêh:

“Ƀing mơnuih mơgăt rơdêh kiăng rang kơđiăng lơ̆m mơgăt rơdêh pơgiăng kơtrâ̆o lơ̆m trun ƀơi jơlan čun čoe kiăng pơdơi hlâo, lăng glăi phai, ƀu lăng, ngă rơ-ơ̆ tơkai rơdêh. Lơ̆m trun ƀơi jơlan čun čoe kiăng lăng hơdôm kơƀang pơhŭi hlâo anih hŭi rơhyưt. Mơnuih mơgăt rơdêh kiăng đuăi rơnang kiăng huăi ngă tơ̆i phai amuñ bưp tơlơi truh sat”.

Ơi Khuất Việt Hùng, kơ-iăng khua Jơnum min wai lăng jơlan glông dêh čar brơi thâo, ƀơi tơring čar Kon Tum lăi phara hăng kual Dap kơdư hnun mơn bruă ngă soh tơlơi phiăn lơ̆m đuăi rơdêh amăng jơlan glông, anun lĕ rơdêh pơgiăng kơtrâ̆o đơi, mơnuih ƀon sang đĭ môtô, rơdêh thut ƀu đoa đôn, mơñum tơpai ƀiêr ăt mơgăt rơdêh mơn. Amăng hơdôm ară jơlan amăng kual ăt hơmâo lu anih hŭi rơhyưt juăt ƀuh rơdêh pơjrŏm. Yua anun jơnum min wai lăng jơlan glông dêh čar hăng gong gai, gơnong bruă bơdjơ̆ nao hơdôm boh tơring čar tŏ tui pơtrut kơtang bruă mă kiăng pơplih tơlơi pơmĭn kơ ƀing mơnuih đuăi rơdêh amăng jơlan glông:

“Bruă ƀing gơmơi pơphun pơtô pơblang hơdôm tơlơi pơsit kơ bruă pơhlôm rơnuk rơnua amăng jơlan glông anun lĕ: anăm mơñum tơpai ƀiêr lơ̆m đuăi rơdêh, anăm pơgiăng kơtrâ̆o đơi ôh, anăm đuăi rơdêh kơtang, khŏm đoa đôn lơ̆m đĭ môtô, rơdêh thut. Hơdôm tơlơi pơsit anai amuñ tañ hluh. Mơng bruă pơtô pơblang ƀing hlăk ai, hăng abih bang mơnuih thâo hơdôm tơlơi pơkă mơng tơlơi phiăn, thâo hơdôm tơlơi pơsit pơhlôm rơnuk rơnua amăng jơlan glông. Mơng anun ƀơƀrư̆ ngă mơnuih ƀon sang rang kơđiăng pơhlôm rơnuk rơnua lơ̆m đuăi rơdêh hăng ngă kơ bruă wai lăng amăng jơlan glông jai hrơi klă ƀiă dong.