Laih dong tơring čar hơmâo kĭ pơkôl ngă hrŏm hăng tơring čar Attapeu, dêh čar Lao. Sit biă ñu, khua mua Jơnum min mơnuih ƀôn sang tơring čar  Dak Lak hơmâo mông bưp 27 grup mơng tač rơngiao nai jơnum ngui kơphê Buôn Ma Thuột. Amăng anun hơmâo yă Vanusia Nogueira, Khua grup kơphê jar kmar; ƀing khua anih jưh pơ ala dêh čar Mi ƀơi Việt Nam, Khua anih jưh Mông Cổ, Philippines ƀơi Việt Nam, khua anih jưh pơ ala dêh čar Nga, India ƀơi ƀôn prong Hồ Chí Minh, Khua anih jưh pơ ala dêh čar Lao ƀơi Đà Nẵng…

Đĭ pơhiăp amăng mông bưp, ơi Trương Công Thái, kơ-iăng Khua Jơnum min mơnuih ƀôn sang tơring čar Dak Lak čang rơmang, amăng hơdôm hrơi jơnum ngui, ƀing tuai mơng tač rơngiao nao ĕp lăng kual lŏn mơnai, ană mơnuih Dak Lak lăi hrŏm hăng plơi prong Buôn Ma Thuột hnun mơn. Ñu ăt čang rơmang Khua anih jưh pơ ala hơdôm boh dêh čar ƀơi Việt Nam, grup khua mua gong gai hơdôm boh tơring čar mơng dêh čar ha guai, Khua anih jưh pơ ala hơdôm boh dêh čar, tuai mơng tač rơngiao amra gum hrŏm hăng Dak Lak ngă lar hyu rơnoh yôm mơng gru grua, kơphê jơman mơng Buôn Ma Thuột kah hăng tơlơi dưi pơđĭ kyar djop mơta amăng kual lŏn yôm anai tơl gơyut gơyâo amăng rŏng lŏn tơnah.