Tơkeng mơ̆ng kual plơi pla rin Ea Sup, tơring čar Dak Lăk, tơlơi hrăm hră dŏ hơmâo lu tơnap tap, dra djuai ania Mường Hoàng Thị Thu Phương găn rơgao djŏp tơlơi tơnap či ngă bruă ñu hor. Ră anai ñu glăk hrăm thun tal 4 bruă Quản trị Nhân lực pơ Sang hră gưl prong Đại học Lao động Xã hội ƀon prong Hồ Chí Minh, Phương ƀu kơnong hrăm rơgơi đôč ôh, ñu ăt jing ding kơna grup djru mơnuih mơnam ƀơi sang hră gưl prong, laih anun pơ sang hai ñu juăt djru ngă lu bruă kơ plơi pla mơn.

“Mơnuih mă bruă jing ƀu dưi kơƀah ôh či pơđĭ kyar lŏn ia, anun jing kâo pơmin amra nao jơlan kjăp pơ anăp anai. Laih dong kâo pơmin pô kâo anai hor ngă mơnuih git gai črâo bruă mơn anun jing kâo hrăm bruă wai lăng mơnuih mă bruă. Kâo kiăng gum djru, dưi glăi pơ plơi pla, tơdah dưi kâo kiăng ngă bruă pơ tơring glông”.

H’Uyên Byă, dra djuai ania Êđê dŏ ƀơi tơring glông Krông Bông, Dak Lăk jing čơđai sang hră gưl prong ƀơi ƀôn prong Hồ Chí Minh. Mơ̆ng thun hrăm tal 1, H’Uyên pioh mông ngă bruă djru plơi pla kah hăng Bơyan pơdơi prong mơtah, pơyơr drah wơ̆t hăng lu bruă jơnum pơ sang hră gưl prong dong. Bruă ngă thim gah rơngiao wơ̆t hăng lu bruă djru mơnuih mơnam jing djru kơ H’Uyên kjăp bruă hloh, thâo hluh hloh mơ̆ng anun djru pô ñu dưi ngă truh kih bruă jao hăng sa čô nai pơtô pơ plơi pla.

“Lơ̆m hơmâo hrăm pơ ƀôn prong Hồ Chí Minh, sa boh ƀôn prong đĭ kyar jing kâo pơmin dưi hrăm rơguăt djŏp bruă, thâo rơgơi hloh đah mơ̆ng dưi glăi djru plơi pla, pơtô glăi hơdôm tơlơi kâo hơmâo hrăm kơ ƀing čơđai, laih anun djru čơđai sang hră kjăp hloh tơlơi pơmin amăng rơnuk pơplih phrâo ră anai”.

Bơ hăng H’Sian Êban, djuai ania Êđê, dŏ ƀơi tơring glông Krông Pač, ñu hor djru neh met wa hơduah ĕp tơlơi phiăn laih anun plai ƀiă hơmâo pô kơtư̆ juă lơ̆m hơmâo kơđi, mơ̆ng anet ñu pơmin khŏm hrăm rơgơi kiăng dưi ngă luâ̆t sư jing pô thâo kơđi mơ̆ng plơi. Ră anai ñu glăk hrăm thun tal 3 ƀơi Sang hră Phat kơđi ƀôn prong Hà Nội, H’Sian ƀu kơnong hrăm rơgơi đôč ôh ăt jing sa čô mơnuih rơgơi pơhiăp ba jơlan amăng mông jơnum, djŏp bruă ngui ngor. H’Sian kiăng glăi pơ plơi pla tơdơi kơ hrăm giong.

“Mơ̆ng blung a mơtăm kâo pơmin či nao hrăm lĕ kâo lăi pơthâo hăng amĭ ama laih, kâo amra glăi pơ Dak Lăk či djru glăi plơi pla. Hơmâo lu tơlơi klă gah rơngiao adih, samơ̆ arăng tơña hrăm thâo tui anun, rơgơi pơhiăp tui anun ih kiăng dŏ glăi pơ anai mơn, kâo lăi ƀu gưt ôh, kâo kiăng glăi pơ Dak Lăk či djru pơđĭ kyar ană plơi pla”.

Tơring čar Dak Lăk hơmâo hơdôm rơbâo čô čơđai sang hră djuai ƀiă glăk hrăm pơ hơdôm boh sang hră gưl anet, prong amăng dêh čar. Amăng anun hơmâo lu čơđai sang hră hrưn đĭ hrăm hră, gum ngă djŏp bruă djru mơnuih ƀôn sang amăng hăng gah rơngiao sang hră. Anai ăt jing mơnuih rơgơi mơbruă amăng grup hlăk ai sang hră gưl prong ăt kah hăng lơ̆m glăi pơ plơi pla jơnum, bruă mă.

Amai H’Giang Niê, Khua hlăk ai Ping gah, Khua khul čơđai sang hră gưl prong Việt Nam tơring čar Dak Lăk brơi thâo, hăng tơlơi gơgrong bruă mơ̆ng ñu, grup hlăk ai, čơđai sang hră gưl prong lêng kơ djru ba kiăng čơđai sang hră, biă ñu čơđai sang hră djuai ƀiă gum bruă amăng khul. Grup “Čơđai sang hră gưl prong 5 klă” ƀơi hơdôm boh sang hră gưl prong hơmâo akŏ pơjing pơhưč lu čơđai gum hrŏm.

“Gơmơi anăp nao ƀing čơđai sang hră gưl prong khŏm thâo hluh pô gơñu kiăng hơget, jơlan ƀing gơñu kiăng nao, laih anun gơmơi gum tui tlôn kiăng ƀing ñu dưi apăn bruă pơhiăp tom amăng mơnuih mơnam. Rơngiao kơ hrăm pơ sang hră, kiăng thâo kjăp bruă amăng plơi pla, yôm hloh lĕ gơmơi kiăng gơñu thâo ƀing gơñu hơmâo tơlơi gơgrong bruă djă pioh, pơtrut tui gru grua djuai ania, mơ̆ng anun pơtô pơblang bang hyu hloh hơdôm tơlơi klă hiam amăng mơnuih tơpuôl”.

Đuăi mơ̆ng plơi pla, ƀing čơđai sang hră djuai ania ƀiă ƀơi Dak Lăk gir hrăm hră, hrăm tui tơlơi rơgơi ƀơi hơdôm boh sang hră gưl prong, ăt kah hăng djru bruă kơ mơnuih tơpuôl. Hăng anih hrăm hră rơnuk phrâo, ƀing čơđai ƀu pơdơi hrưn đĭ, anăp nao plơi pla, pơyơr pran jua akŏ pơdong plơi pla pô. Anai jing mơnuih yôm biă mă đah mơ̆ng dưi đĭ kyar tơring čar Dak Lăk ăt kah hăng rim phung djuai ania amăng hrơi blan pơ anăp.