Thun anai, tal pơdơi ngă yang thun phrâo sui hrơi, laih anun ayuh hyiăng hiam klă anun yơh plơi prong Đà Lạt-Lâm Đồng pơhưč lu tuai nao ngui hyu ĕp lăng anih hiam hăng pơdơi pơdă. Tuai lu, hơdôm anih sĭ mơdrô bơwih bơwăng kơ tuai ƀong huă, ngui ngor amăng lăm plơi prong ƀơi anŏ kơniă samơ̆ bruă mă ăt hruaih đôč hăng hơmâo tơlơi hơgĕt ôh. 

Lăp đing nao biă mă lĕ, yua tuai lu bơkơnar pơpha amăng lu kual, huăi kơniă sa bit ôh, anun yơh anih pơdơi pơdă, sang jưh tuai ăt djop mơ̆n kơ tuai đih pơdơi amăng mơmŏt mlam. Tui hăng anom bruă tuai čuă ngui tơring čar Lâm Đồng, mrô tuai nao pơdơi pơdă, hyu ngui amăng Đà Lạt truh mông têt 250 rơbâo wơ̆t, đĭ tui 2 wơ̆t mơkrah pơkă hăng têt thun hlâo; amăng anun 12 rơbâo 500 čô tuai dêh čar tač rơngiao. Ră anai mah abih laih hrơi pơdơi ngă yang thun phrâo samơ̆ Đà Lạt-Lâm Đồng ăt pơhưč lu tuai hyu ngui akŏ thun phrâo.