Ƀơi Jơlan hơdră, 20 čô mơnuih pơplông pơ ala brơi kơ hơdôm rơwang bruă ƀơi anăp lăi pơblang hăng lăi glăi hơdôm tơlơi tơña lăi nao mơ̆ng grŭp čom puang kơ akô̆ bruă, tơlơi pơmin pok phun bruă mă mơ̆ng pô. Anai lĕ hơdôm rơwang bruă klă hloh dưi ruah tơdơi kơ găn rơgao 2 rơwang pơplông hăng ruah mă phun, pok phun mơ̆ng blan 2 phrâo rơgao.

Tơdơi giăm hmâo 2 blan pok phun, bruă pơplông hmâo čơkă mă laih rơbêh kơ 100 rơwang bruă, tơlơi pơmin mơ̆ng mơnuih amăng khul đah kơmơi gum hrŏm, djơ̆ tui anăn ñu “Pơplih Mơtah” amăng bruă ngă đang hmua, sĭ mơdrô. Hơdôm rơwang bruă, tơlơi pơmin hăng hơdôm gơnam lu mơta, phara ha jăn, mă yua tŭ hơdôm anô̆ kơtang mơ̆ng hơdôm gơnam ƀơi tơring čar kah hăng kơphê, mắc ca, bôh ñông, hơdôm phun jrao pla; mă yua tŭ hơdôm djah phun pla hăng gơnam pơkra pioh ngă rai gơnam pơkra glăi, gơnam yua sa wot pơhlôm amuñ prai rai, klă hăng lŏn mơnai ayuh hyiăng./.