Tơdơi kơ ngă lơphet čơkă mơtăm, Đại tướng Phan Văn Giang bơkơtuai hăng Đại tướng Tea Banh. Amăng mông bơkơtuai, Đại tướng Phan Văn Giang hăng Đại tướng Tea Banh tŭ ư pơsit, thun 2022 phrâo rơgao lĕ thun hmâo bôh tŭ yua yôm phăn hăng tơlơi rô nao rai dua bôh dêh čar, dưi hmâo khul mua gưl dlông dua bôh dêh čar pơsit lĕ “Thun giăng mah Việt Nam – Kur, Kur – Việt Nam”.

Gah jơlan gah gum hrom pơ̆ anăp anai, Đại tướng Phan Văn Giang hăng Đại tướng Tea Banh tŭ ư hrom hơdôm bôh yôm Kơčăo bruă gum hrom pơgang lŏn ia 2023 hluai tui pran jua, đăo gơnang, sit nik, ba glăi bôh tơhnal, lăi rơđah amăng sa dua bruă phun: Kơtưn gum hrom lăi pơthâo nao rai tơlơi pơhing, tơlơi, gum hrom hyu tir, wai lăng kơjăp rơnuk rơnua hơđong ƀơi rŏng lŏn hăng ƀơi dlông ia rơsĭ; gum hrom pok pơhai ba glăi bôh tơhnal bruă gum hrom hơdôm bôh yôm bơdjơ̆ nao amăng thun Kur pơphun bruă pơplông SEA Games 32 hăng ASEAN Para Games 12; đing nao gum hrom dong amăng bruă pơtô juăt mơnuih mă bruă, gum hrom hơduah ĕp, tum pơƀut, ba glăi tơlang tơleh ling tơhan pơsăn drơi hăng mơnuih juăt bruă dêh čar Việt Nam rơngiă ƀơi Kur amăng hơdôm rơnuk blah ngă./.