Rơđah biă mă ñu, amra hơmâo 7 čô khua anih jưh pơ ala, 5 čô khua anih jưh pơ ala ƀơi ƀôn prong, tơring čar laih anun hơdôm tơring čar mơ̆ng dêh čar Mông Cổ, Kur, Hàn Quốc, Lao hăng lu khul, grup ngă hrom, anom bruă tơlơi pơhing phrâo, sang bruă sĭ mơdrô mơ̆ng jar kmar. Hrom hăng lu bruă ngă hrom mơak amăng mông jơnum ngui ngor, hơdôm grup anai amra nao čuă  đang hmua pla boh sầu riêng, anih ngă hmua pla pơjing, anih kơ-uă pơkra tơpung kơphê hăng hơdôm anih tuai čuă ngui amăng tơring čar Dak Lak.

Kơnong kơ dua grup adoh suang tơring čar Champasak dêh čar Lao, Jeollabuk dêh čar Hàn Quốc hơmâo čih anăn ngă hrom rŭi hyu pơdah adoh suang amăng jơlan plơi prong hăng nao pơdah pơ tơring glông Lak laih anun Ƀuôn Đôn. Khul khua mua pơphun tal jơnum ngui bruă kơphê hăng djop gơnong bruă ƀơi tơring čar Dak Lak pok pơhai hơdră tŭ jum tuai, bơwih brơi mơnong ƀong huă tong ten kiăng tuai dêh čar tač rơngiao nao jơnum hrom ngui bruă kơphê Ƀuôn Ma Thuôt tal 8 thun 2023 mơak pran jua.