Khă tui anun, ƀing tuai hyu ngui nao pơ Dak Lak lĕ hyu ngui ĕp lăng rơman, anun lĕ lăng arăng tring rơman, ngă yang đưm pơpŭ drơi jăn rơman, brơi rơman ƀong djop mơta boh čroh, rơ̆k tơ̆k rơman juâ̆t ƀong, pơplông pơhrôp hiam kơ rơman, pơplông brơi rơman kơkuh kơ tuai, mă rup hăng rơman.

Tui hăng tơlơi lăi pơthâo mơ̆ng Anom bruă ba tuai hyu ngui hăng sang jưh tuai Biệt Điện plơi prong Ƀuôn Ma Thuôt, Dak Lak, mơ̆ng lơ 10/2, anom bruă anai pơdơi yơh bruă ba tuai hyu ngui đĭ rơman ƀơi anih lŏn mơnai ia krông tơdrông tung tai Ƀuôn Đôn să Krông Na, tơring glông Ƀuôn Đôn,  tơring čar Dak Lak, pơhrua nao hăng anun lu bruă mă ba tuai hyu ngui hăng hơdră pơkŏn ăt djă gru hiam mơ̆ng tơring čar kah hăng ba tuai hyu lăng, ngui hrom rơman, pơphul hrom rơman, rơbat hyu hrom rơman. Bruă ngă anai, hluai tui tơlơi pơtrun mơ̆ng tơring čar Dak Lak kơ hơdră pơdơi abih bruă mă đĭ rơman găn ia krông pioh mă prăk ƀing tuai apah laih anun kiăng pơgang pioh djuai rơman ƀrư̆ hrơi hin tui ră anai, pơblih bruă mă kiăng ngă mơak, jĕ giăm hăng rơman.

Ăt pơdjơ̆ nao bruă ngă anai mơ̆n, ƀơi hơdră jơnum ngui hăng rơman Ƀuôn Đôn- sa amăng hơdôm bruă mă phun amăng mông jơnum ngui bruă kơphê tal 8 pơ anăp anai, thun 2023 pơphun amăng blan 3 ƀơi Dak Lak, amra ƀu hơmâo bruă mă pơplông rơman đuăi, rơman luai ia, rơman čưng boh lông dơ̆ng tah, ƀu pơplông rơman hơdui hrĕ hăng mơnuih lơi. Pơhrua nao anun lĕ hơmâo hơdôm bruă mă kah hăng tring rơman, pơpŭ kơ rơman suaih pral găng añrăng, brơi rơman ƀong djop mơta mơnong boh čroh, rơ̆k tơ̆k hiam jơman rơman juâ̆t ƀong, pơplông pơhrôp drơi jăn rơman, brơi rơman kơkuh kơ tuai, kiăng rơman ngui hrom mơnuih, hlơi kiăng čơphil rup lĕ mă rup hrom rơman kiăng djă pioh rup....Ơi Vũ Minh Thoại, Khua anom bruă gru grua-tơlơi pơhing tơring glông Ƀuôn Đôn brơi thâo:

“Tơlơi anai lĕ ngă tui tơlơi ƀuăn mơ̆ng jơnum min mơnuih ƀôn sang hăng Sang bruă khul pơgang hlô mơnong glai kual ASIA. Anai lĕ sa jơlan hơdră hiam klă yơh. Ƀing gơmơi ăt kiăng mơ̆n yua dah ră anai rơman rŭi hyu pioh kơ tuai ĕp lăng jing kông ngăn yôm pơphăn laih. Yua kơ anun, ƀu djơ̆ yua kơ jơlan hơdră pơtrun đôč ôh, ƀing gơmơi pô hai kiăng pơgang pioh djuai rơman hin, ƀu hơjăn pô rơman ôh, abih bang khom thâo hluh pơgang pioh djuai rơman. čang rơmang ƀing tuai nao pơ Ƀuôn Đôn kơnong sem lăng rơman đôč, ƀu đĭ rơman hrup hlâo dơ̆ng tah, kiăng pơgang pioh klă, čem rông brơi hiam hơdôm drơi rơman anun hơdip sui hloh klă hloh. Tơlơi kiăng mơ̆ng tơring glông ăt mơnuih ƀôn sang kiăng hnun mơ̆n”.

Jơlan hơdră mơ̆ng kơnuk kơna dưi hơmâo lu tuai rơnguai mơak hrom mơ̆n. Ơi Nguyễn Xuân Thủy, sa čô tuai ƀơi tơring čar Vĩnh Phúc lu wơ̆t laih nao pơ Ƀuôn Đôn hyu ngui lăi, rup rap mơ̆ng rơman ñu ƀu čơlah ôh hăng tơring Ƀuôn Đôn mơ̆ng đưm laih, ƀing tuai rơnguai amăng dêh čar hăng tač rơngiao hmư̆ hing nao soh. Samơ̆, tui hăng ơi Thủy lĕ, đĭ rơman rơbat hyu amăng glai, găn ia krông srepôk lĕ ƀu mơak ôh pap drap đơi, bruă pơblih hơdră ba tuai hyu ngui anun djơ̆ găl biă mă.

“Ƀing ta khom lui yơh bruă brơi tuai apah đĭ rơman hŭi rơhyưt biă mă. 3-4 čô mơnuih đĭ amăng wông rơman, rơman gui ƀơi rŏng, pơgiăng hyu lăng glai klô hăng găn ia krông ƀuh pap drap đơi. Sang anŏ gơmơi tokm nao laih pơ dêh čar Thai Lan. Pơ anai arăng pơphun kơ tuai ngui hrom rơman rơgơi biă mă. Ƀing Thai brơi rơman dŏ amăng anih war pơgang kjăp ƀu dưi jĕ giăm hăng tuai ôh, pơphun brơi rơman ngui čưng boh lông, đuăi, ngă siêk lăng mơak biă. Ƀing ană bă gơmơi dŏ lăng mơ̆ng ataih gah rơngiao war pơgang pơsơi, blơi pơtơi brơi rơman ƀong mơak biă mă”.

Amai Hà Nhi Phương Thảo, tuai mơ̆ng ƀôn prong Hồ Chí Minh nao pơ Ƀuôn Đôn hyu ngui lăi, ră anai phung rơman lan ƀơi Dak Lak aset tui laih, yua rơman ƀu thâo tuh ană ôh dŏ hăng plơi pla. Bruă hyu ngui đĭ rơman jai kraih ngă kơ rơman tañ tha hăng djai, hŭi biă đut djuai. Anom bruă ba tuai hyu ngui khom pơblih yơh hơdră đĭ rơman ba tuai hyu ngui, pơblih hơdră ngă mơak brơi rơman, čem rơman ƀong trơi anun klă hloh.

“Tui hăng kâo pơmin akŏ pơjing tuôr kơ tuai hyu ngui pơdjơ̆ nao rơman lĕ anăm đĭ rơman dơ̆ng tah. Kah hăng hơdră hơduah ĕp, ră ruai kơ bruă rông rơman ƀơi Ƀuôn Đôn hiư̆m pă, pơphun ngui hrom, mă rup hăng rơman, mơnơi brơi rơman hăng čem rơman đôč, bruă đĭ rơman lĕ ngă sat kơ pran jua rơman đôč, laih anun rơman tha rơma, ruă nuă djai đut djuai đôč”.

Hơdor glăi rơgao mơ̆ng anai 2 thun, sa čô tuai mơ̆ng Khoái Châu, tơring čar Hưng Yên đĭ rơman pơ Ƀuôn Đôn,  ƀu bưng ôh, djơ̆ hrơi rơman jôr hăng ngă pơlê̆ trun tuai tơl rơka ba đih pơ sang ia jrao. Tơdơi kơ anun, khua mua pơ ala gah kông ty ba tuai hyu ngui Biệt Điện hlong lăi pơthâo brơi pơdơi mơtam bruă đĭ rơman hyu ngui amăng glai.

Phrâo anai dơ̆ng, Khul pơ ala mơnuih ƀôn sang tơring čar Dak Lak ăt ngă hră pơtrun hơdră djru pơgang pioh kơ rơman tuh ană. Tui hăng anun, tơring čar djru 500 rơbâo prăk kơ pô rơman amăng sa hrơi kiă rơman ania, kơ pô sang hơmâo rơman tơnô sa hrơi lĕ 600 rơbâo prăk, amăng 30 hrơi brơi rơman ania hăng tơnô hyu ngui dŏ hrom amăng glai klô. Tơdah rơman mơkian lĕ, pô rơman anun arăng djru brơi 300 rơbâo prăk sa amăng 10 blan rơman mơkian, 600 rơbâo prăk sa hrơi yap mơ̆ng blan tal 11 rơman ania hlăk mơkian aka tuh truh kơ năm blan tơdơi kơ rơman ania tuh ană.