Ƀơi Anom bruă ngă hră pơ-ar tơring čar Dak Lak, amăng hrơi mă bruă akŏ thun phrâo tơdơi kơ hrơi ƀong tết tui phiăn juăt, mrô mơnuih nao ngă hră pơ-ar aka ƀu lu ôh. Samơ̆, abih bang mơnuih apăn bruă lêng kơ pơwŏt glăi mă bruă hăng pran jua hur har, amra pơhlôm djru brơi klă hloh kơ mơnuih ƀon sang. Ƀơi hơdôm anih tuh tia pơkra pơjing Tân An, kông ti pơčruh ngăn Ban Mê Green Farm glăk pơphun pơkra pơjing boh sầu riêng, pơhăng kiăng ba sĭ mơdrô blung a akŏ thun phrâo anai pơ dêh čar Khač, Japan.

Amăng hơdôm đang hmua, amăng hơdôm hrơi anai, mơnuih ƀon sang tơring čar Dak Lak ăt pơwŏt glăi bơwih brơi phun pla, hlô rông tơdơi kơ hơdôm hrơi pơdơi ƀong tết. Anai lĕ tơlơi hok mơ-ak, pơgôp amăng bruă ngă pơgiong hơdôm hơnong pơkă, bruă jao pơđĭ kyar bơwih ƀong huă-mơnuih mơnam thun 2023 anai.